منتديات الفطاحله - يـمة مـالك ؟(بالدارجي السوداني بقلمي)

[poem=font="Simplified Arabic,5,deeppink,bold,normal" bkcolor="skyblue" bkimage="backgrounds/22.gif" border="inset,3,sandybrown" type=3 line=1 align=center use=ex num="0,black"]
اصلي من تبيت وقمت
قمت مفتون بي جمالك
قمت بتغزل واغني
واشدوا واترنم واعاود
احكي لي الناس
عن خصالك
عن سواتك
عن فعايلك
وعن جمايلك
لما كنتي
تهدهدينا
تسعدينا
وتفرحينا
كنتي يمه
حمايه لينا
فارده جنحاتك
علينا
لما نبرد ياحنينه
بنلقى صدرك
وادفى منك
ما لقينا
او تجينا سموم
نسخن
رشه منك
تحتوينا
ولما نعطش
نحكي سيرتك
نلقى نفسنا
تب روينا
ولما تعصرنا الظروف
نقوم نكورك
يمه .. يمه
بتلحقينا
وتنجدينا
تسعدينا
تفرحينا
إلا بس يا يمه وينك ؟
وين حنانك
حصلينا
اوع تقسي
وتهملينا
إنتي لمن جينا يمه
قمتي إنتي
بتنقذينا
وترعي والدنا الكبيير
الزادو في السبعين
سنينا
إلا ما فكرنا انك
بي سياطك
تجلديهو وتجلدينا
وفي إويضه
صغيرة سخنه
تقسي إنتي
وتحبسينا
وبي معاملتك معاهم
تألبي الجيران علينا
ونبقى مكروهين امامن
وينفثو السم والغبينه
ويجمعوا صفوفن يحلفو
إنو لازم إدبونا
يمه مالك
شين حصلك
شان تقضي العمر كلو
في انصرافية معارك
لو حمدتي الرب شكرتي
وللصبر طولن حبالك
كان بيسر ليك حالك
وكان بوسع للمدارك
إلا بس يا يمه مالك
وشين جرى لك
خلى قلبك
يبقى قسيان
تب علينا
شان تقومي
تفرزعينا
تشتتينا
تفرتقينا
توزعينا
تبهدلينا
تشردينا
تتوهينا
وتبعدينا
تضحكي الشمات
علينا
تخلي اعدائك
يجونا
يبهدلونا
يجوعونا
ويظلمونا
ويطردونا
عشان نفارق
دار ابونا
وعن حنانك
يبعدونا
يمه مالك
يا حنونه
متين يحن
قلبك علينا ؟
وتسمعي الحاصل
تجينا
وتاني ترجعي
تحتوينا
وتسعدينا
وتفرحينا
يمه مالك؟
شين حصل لك؟
قلنا .. سبعه
وذدتو سبعه
وتاني قربو
يبقو سبعه
وكلهن بقرات عجاف
في الأراضي البور
بترعى
وفي القليب
حسينا وجعه
وفي الضمير
وخزات ووجعه
وكل عمرنا
نقضي وجعه
وقسوة الأم
تبقى بدعه
وطفلك الشلتيهو
تسعه
ومن شطيرك شالو
رضعه
كيف تخلي
وحيد بيسعى
يمه مالك؟
شين حصل لك؟
ارجعي ولمي الشتات
كان بنين او كان بنات
حتى لو جثث او رفات
قولي لينا الماضي فات
وتاني ارجعي
فرحينا
واسعدينا
اجمعينا
إلا بس ما تطرحينا
واوع قلبك
يا حنينه
يبقى يوم قسيان
علينا
يمه .. مالك
وشين حصل لك؟
وشين جرى
لك
واوع بس
يخطر ببالك
إني جيتك
شان احاسبك
او اعاتبك
او اقلل
من مراتبك
إلا بس
يايمه تهت
وما عرفت دروب
وصالك
جيتا شان عارف
خصالك
جيت فشان اسعد
قبالك
ياني كوكب
وديمه داير
في مدارك
جيت فشان مااحكي
حالي
ودون ما تحكي بعرفو
حالك
ما اصلي من تبيت وقمت
قمت مفتون بي جمالك
وديمه بتغزل واغني
واشدو واترنم واعاود
احكي للناس
عن خصالك
وتاني بسأل
الف مره
شين دهاك؟
يا يمه مالك ؟[/poem]