ردية بيني وبين الخلاوي
 

[poem=font="Simplified Arabic,5,darkblue,bold,normal" bkcolor="transparent" bkimage="" border="none,4," type=0 line=0 align=center use=ex num="0,black"]
عثمان:
حيّاك ربّك من تسمّى الخلاوي =أصلك وفصلك كان ما فيه عايبه
الخلاوي:
لي في نزار وزارةٍ اكتفي بها=ولي في نزار الجود اعلى مناسبه
عثمان:
البعض قالوا عنك بالأصل هايف =ومادمت أصيلٍ فليش اسمك تجانبه
الخلاوي:
واذكر وصاة من منيع بن سالم= وغيري الى (من جاع تظهر معايبه(
شبيهة ميثاء يالصليبي خلها =ولو كنت جايع (والصفاري بلهايب(
وخليتها لعيون ميثاء عتيقه =عتيقة صليبي (ذراعه كسايبه)
صبرنا وعدنا في صليب وحالهم =وما عابهم واهفا هفاهم جلايبه
عثمان:
يعني اصولك من صليبٍ وربعهم=وين العلاقة مع نزار ونسايبه
الخلاوي:
ترى صليب اجاويد نما الجود جدهم=نزار الذي صلب العرب من صلايبه
اجاويد قوم قلب الله قلوبهم =بحيلات سوء عابت القوم خايبه
قوم طغوا والناس في الجاهلية =وازرى بهم شرك تطاما غبايبه
عثمان:
كلامك جديدٍ تجهل الناس ساسه =فاللي يعرفونه من افكار صايبه
يقولوا بقايا حملةٍ للصليبي=بعد حملة للشرق عادت بخايبه
وعندك خبر منها فليا تجادل=فهي سابقه وقتك وتدري نوايبه
الخلاوي:
الا ايها اللوام كفوا ملامكم =وخلوا سبيل الخلاوي و صاحبه
فماذا لكم لا اسعد الله فالكم =من الحظ في تصريم حبلى وجاذبه
صبرنا على البلوى وما جا من السما= وشلنا حمول فوق ما يطاقبه
يباتون حسادى على صالي الغضا = ويضحون في ذل من الله خايبه
عثمان:
الرجل من فعله ولا افعال جده=ومهما يكن اصلك ففعلك مغالبه
لكن بغيت افهم عن الشعر حاجه =وش شوفتك في الشعر واللي يقاربه
الخلاوي:
قد قلت اشعار الملا هي ثلاثة=من راي فكر حل قلبي وجالبه
شعر يموت وصاحبه حي لو فنى =وشعر يعيش ماعاش صاحبه
مامات من هذي بقاياه في الورى=ولا نسي من أنشا من الشعر صايبه
ترى الناس من فج عميق تجيله=وتجري مدامعهم على الارواح ذاهبه
عثمان:
ممكن عسى تسلم نعرف الخلاوي=من نظرةٍ للكون بالنصح طايبه
الخلاوي:
العبد بالنيات يجزى بما نوى= في نفس قول الله والشرع قال به
فلا للورى عما بدى الله متقى =ولاحيله يحتالها الخلق (صايبه)
ولاخير في مالٍ عن الله شاغل = ولاخير في دنيا عن الله حاجبه
عثمان:
دنيا بليّا دين نقمه على الفتى =ما يهتني فيها لكثرة مصايبه
ورجل بليّا خوف من رافع السماء=مهما تقرّب لك فليّا تقاربه
الخلاوي:
الى دقت الوسطى بالأبهام تذكرت = زمان مضى ماله رجوع (بعجايبه)
فلابد ماسحم الضواري تحوفني = بليل ولالي عن لقاهن (حجايبه)
نعد الليالي والليالي تعدنا = العمر يفني والليالي (عقايبه)
ومن قال إن الحذر يمنع القدر= فأقاويل جهال من ابليس كاذبه
الاقلام جفت بالذي سار واستوى =على الكون وطوال السجلات كاتبه
عثمان:
العاقل اللي في حياته تفكّر= يدري النهاية كنها الشمس غاربه
وما قدر الرحمن لابد واقع =والمؤمن اللي ما تهزه مصايبه
الخلاوي:
من تابع المشراق والكن والذرا =يموت ماحاشت يديه( لطلايبه)
فاغنم متى ما لاحت من العمر فرصة =وان هب نسناس فإذرفي سواسبه
ترى أبرك ساعات الفتى مابها الفتى=ومافات مات وساعة الغيب غايبه
والي ضاع عمر المرء في ليت أو عسى=فكثير التمني مابنى بيت صاحبه
فمن عود العين الرقاد تعودت= ومن عود العين المساري (تصاحبه)
ياطول ماوسدت راسي كتاده= ما بي وساده خايفٍ من تبايبه
عثمان:
الدين ماهو رهبنه في العباده = لكن عمل ايضا يقوّي شكايبه
ومن لا استغل لقوته في شبابه =ما يهتني في شيبته من مكاسبه
والدين يدعو للتواضع قناعه = يبي رجالٍ تحتمل كل نايبه
الخلاوي:
والاطباع تطبع جود من جاد جده = ولو كان من بيت رفيع وناصبه
والأطباع تارد الفتى مارد الردي =ومالدين والدنيا والأطباع خاربه
عثمان:
فالرجل ماهو من تعزوى بجده = لكن بفعله ما انعرف عنه عايبه
الخلاوي:
مقام الفتى في منصب العز ساعة=ولا الف عام يصحب الذل صاحبه
حياة بلا عز محا الله حظها= حياة الفتى لافاتها العز خايبه
والذل داء للضواري يسلها=كما سل داء السل معلوق صاحبه
فإلى المرء صار العار والذل حظه = فالموت سترٍ له يغطىَ معايبه
والاجهاد عدى اللايمات من الفتى = والارزاق ماتأتي الفتى من (طلايبه)
والدار ما يحصر عليها وليدها = دار الفتى ما طاب فيها مكاسبه
عثمان:
والله اقسم بالنفس ليش ذلّها =من اجل دنيا يوم لابد ذاهبه
فافعل سبب فالرزق معروف ضامنه =حتى ولو هاجرت والنفس ذايبه
الخلاوي:
وحريب جدك لو صفى مايودك = وعينيه لو تبكي لك الدم كاذبه
ومن لايعدي عن حياضه تشرع = ومن لايكرم لحيته حلق شاربه
ومن لايرد الضد بالسيف والقنا=ويحمي الحما تطلع عليه الثعالبه
ومن لايباشر شر الاشراروالعدا= يوطا وكف عداه لحماه خاربه
ومن عود الصبيان ضرب بالقنا =نخوه بنهار الكون (والشمس غايبه)
ومن عود الصبيان من زاد بيته=عادوه لو هم من( قرايب قرايبه)
عثمان:
هذا يفسّر هجمة الغرب وأصلها=فالحقد من جدّانهم من سبايبه
داسوا مهابتنا وعشنا المذله =حتى لحانا مالها اليوم هايبه
فلا السيف نافع دام نضرب من السما=من دون علم الحال لاشك عاطبه
الخلاوي:
وترى احسد الحساد ترميه غيره=ويكفي بها داء عن الموت نائبه
فلولا الحسد مازال ابونا مخلد =ولام حوا في نعيم بجانبه
ومن أكرم الحساد أشوى قلوبهم = في قلة حمراء من النار ثاقبه
عثمان:
"تموت الافاعي وسمها في نحورها"=والنار تاكل مابقى من لهايبه
فاعمل ولا تهتم في حقد حاسد = فالصمت سيفك كان تنوي تحاربه
الخلاوي:
ترى الصبر مفتاح الافراج كلها =ولو هو برقيك مر حلو عواقبه
والصبر محمود على كل ماجرى = الا الى ادى الى ذل صاحبه
عثمان:
الصبر طيب دون ياسٍ من الفتى=واللي بقلبه دين صبره ركايبه
الخلاوي:
قولوا لبيت الفقر لايامن الغنا =وبيت الغنى لايامن الفـقر( جانبه)
ولايامن المضهود قوم تعزه = ولايامن الجمع العزيز) لمصايبه)
فما بين غمضة مقلة وانتباهه = فلا يندرى من أين تذوي هبايبه
عثمان:
دنيا تقلّب ما عليها دليله= والعاقل اللي والم لكل نايبه
كم ليلةٍ بالحزن فرجت مع الفجر =وكم ليلة بالسعد بالفجر قالبه
الخلاوي:
وللجار حق قاله الله في السماء =وللجار أدى صفوة الله واجبه
عثمان:
اليوم جارك اقرب الناس حولك=تلقاه في لحظه على اخوك صاعبه
الخلاوي:
ولاتتقـي في خصلة مالها ذرا=ولاتنزل الا عند (مفّل ركايبه)
عثمان:
ذراك هالأيام قرشك وجاهك = و (واوٍ )تخلي حجتك دوم غالبه
الخلاوي:
ولاتـسفه المنيوب لاجاك عاني= اياك (ووعودٍ مع الوقت كاذبه)
عثمان:
ولا تصير ضفعه كل يلعب عليها= تكفل خسيس ثم تدفع ضرايبه
الخلاوي:
ومن عاب شخص قبل يبصر بنفسه= يرى فيه ما لا ينحصر من معايبه
عثمان:
فكلٍ به عيوبه ولا فيه كامل =الا اله العرش مجري سحايبه
الخلاوي:
وترى شور من لا يستشيرونه الملا =شمعة نهار في ضياء الشمس ذايبه
فالبير مايدري بها الا دليلة =وخيار من ينبيك بالبير شاربه
وفي الراي يا مشكاي خمس تعجل = ونقص تأخرها تلاقي ضرايبه
الجد والتزويج والحرب للعداء = والفرض والقرض الذي في نوايبه
عثمان:
النصح واجب دون ادنى مضره = لا صار خلك يشتكي من مصايبه
والعلم وفرّ كل نصح تريده=في "النت" تلقى ما تبي من عجايبه
بعض التعجل مورثٍ للندامه =وخصوص في التزويج والنفس طالبه
لكن وش اللي تنصحه يالخلاوي=بين النساء ما دمت بالراي صايبه
الخلاوي:
لاتاخذ الهزلا علشان مالهـا= ولاتقتبس من نارها (او لهايبه)
لاتاخذ الا بنت قوم حميده=عـسى ولدها (يكف عنك مصايب)
فاختص عفرا شارق الشمس خدها =وتغني عن القنديل ماالشمس غايبه
خدً وقدً واعتدال وقامه =وردفٍ طوى للثوب سبحان ناجبه
ليلٍ مقفاها وصبحٍ قبالها = ومن كل دل زاهي الزين جالبه
لعوب كعوب جل من صاغ وصفها= تثنى وحال الشد ياصاح جايبه
در نفيس منتقى كل منتقي = كالدانة الصفراء لدى الرأي ناجبه
وترى سيد الاحكام ماكان مرتضى = ومن يرتضي شيئ ويهواه( صايبه)
عثمان:
نصف الشباب اليوم ببلا وظيفه=وبناتنا عنس ترى النفس طايبه
وش لون يتشرط فقير ومعدم = لا من لقى له "ابلة" الخير جالبه
مادامت القاضي وترضى لنفسها= ياحسين ارجسها ترى الوضع سايبه
الختام:
عزّ الله إنّك يالخلاوي مجرب =واللي ذكرته يكشف اسرار غايبه
هذا كلام الحرّ من نسل يعرب=وأصل الرجل طبعه يوضّح صلايبه
وما قلت قبلك قاله رجال ودّعوا =زهير بن سلمى قد مشيت بركايبه
لكن ترى ما كل ماقلت نافع =بوقتٍ قلب والناس تشكي لهايبه
مشكور راشد رحلة اليوم وانتهت= مقبول بالفردوس تسعى برحايبه[/poem]

ياسلام عليك يا مشرفنا
ابداع رائع

بس الله يهديك كنك احرجت الرجال اول ما هنا

صحت السنكم حكم تكتب بماء الذهب

صح لسانك يابو عبد الله
على الردية الرااااهيه
المليئة بالحكم والامثال

صح لسانك يامشرفنا مواعظ وحكم تسلم الله لا يحرمنا من حرفك تحياتي

صح لسانك

ويعطيكم العافيه جميعا:)


تحياتي لك ..