هذاك يالطامي ودادي من اسنن ,,

[حرف وشعر]

قالت سرحنا قلت يالله علي ويـن=قالت بحر قلت البحـر مـا احبـه
قلبي يحب السيـح والبـر يازيـن=وجمر الغضا لاقمت بيـدك تشبـه
وادلال صفر(ن) كل ابوهن رسالين=وفنجال اشقر في يمينـك نصبـه
اهلا هلابـك مرحابابـك وسهليـن=الجو هـادي واقشـر الهـم كبـه
عطني اعلومك وابتهج يريش العين=ونب العلوم اللي من الـراس نبـه
في منزل (ن) مابه ازحام وقوانيـن=لابـه مـرور ولا بريـك ومطبـه
من فوق جيب (ن) ركبوله بوالين=يقدح اجنوطه فوق ظلع (ن) يربـه
ورفارفه هيبه من ايسـار ويميـن=كنه سفيـه تنطـح امـواج غبـه
البر والله فـي عيونـي بساتيـن=بر(ن) نحبه لـو امحولـه تذبـه
اعشق جمال الباديـه والبداويـن=وانا بدوي مافي البدو من مسبـه
اكرام حنا من ارجال (ن) كريميـن=وارجالنا عنـد الطلـب مستهبـه
البـر راحـه وارتيـاح ورياحيـن=لاذعذع النسناس مـع كـل هبـه
وحنا بجو البـر مثـل السلاطيـن=أمن وامـان وحالـة(ن) مستتبـه
والبدو عشـاق البنـات المزاييـن=عشق (ن) يذكر كل عبد(ن) بربـه
محلا سهرنا يـوم كنـا مقيميـن=نقطف من اثمار الهوي والمحبـه
بحر العيون الناعسـات المفاتيـن=يرمي عشاشيق الهوي وسط غبـه
هذاك يالطامي ودادي من اسنيـن=مزيون يامنصور لحـد(ن) يسبـه
والحمد لله كمـل الشـرع والديـن=مابين فرض وسنة (ن) مستحبـه