مجاويد الشفا ..!

[سلطان العطاوي]

مشاركة يسبقها العذر على الغياب الغير مقصود


,
,
,


آمنت بالله خالق النور واللوح =رزاق طير الجو ضامن حياته
سجدت له خوف وتعالى له النوح = نوح الرجا ما هوب نوح الشماته
دمعة عزيز الروح تطلع من الروح = ودمعة ذليل الروح نبرة شتاته
إذا بكى الخايف من الله مسموح = واذا بكى الخايف من الناس جاته
الذل سكة موت والموت مطروح =في كل لحظة ذهن من عمر ذاته
والا الرجا بالله يبنى به اصروح = وايمان قلب الشخص يضمن زكاته
الآدمي لا صار محرج ومجروح = وريقه تعذر لا يبلل لهاته
ما عاد عنده شي يخفيه للبوح = كل العزاوي حطها فأمنياته
وأنا رجل تغريني الدوح وأدوح = فكري ورى المذن وحزة صلاته
عندي أمل بأن اكثر الهم منزوح = وعندي رجا فالمعتبر وأغنياته
اجلس على عد الضميين واموح = دلوِ مجاويد الشفا في عصاته
وأذا تطرق ذكر مادح وممدوح = طرى علي اللي عهد لي وصاته
وخليتها تمشي على غير مصلوح = ما بين وده للملحن وهاته
آمنت بأن الوضع للنفس مشروح = الآدمي ما يضمن الآ وفاته
ما كل درب فأول الريع مسروح = ولا ينحدي ذيب الحصى عن حصاته