(المستريح اللي من العقل خالي)

[الطائر المهاجر]

(المستريح اللي من العقل خالي)= مافكر بغيره ولا تابع اخبار
في وقت فيه الفكر لازال بالي=واللي بعقله فكر بالوضع محتار
لو هو تكلم قيل هذا خيالي= ولوهو سكت يشعر بجوفه كما النار
فاللي يعرف الأمر ماهو مبالي=يمكن رصيده ينقذه وقت الاخطار
ولو هو فقيرٍ قال ماهو مجالي = همه بفقره مالقى نصف دينار
وانا بدرب الحق مهما جرى لي = ولاني منافق خاتل بكل مشوار
اوضح الصوره بصدق المقالي= للي جهل بالأمر من بعض الاخيار
يلعب بنا الغربي جنوب وشمالي= ويلعب بنا الشرقي على كيف يختار
وفي لعبة الشطرنج شفنا الختالي= وتنفيذ لعهودٍ مضت بين الاشرار
بين المجوسي واليهودي الموالي= بانت لنا الصوره على كل الاطوار
تقسيم في تقسيم حتى الزوالي= لارض العروبه بين طاغي وجبار
خوفٍ تعيد امجادها بالنضالي = لعهد الفتوح وحكمها كل الاقطار
لكن مهما الموج بالمكر عالي= مكر الله اكبر من خبيثٍ ومكار
يالله ولا غيرك عزيز الجلالي = تحرق بعضهم في بعض حرق الاشجار