ضُـلّ الفيل طعنّي

[محمد اسماعيل الرفاعي]

مـرّه مرقتـا أفتِّـش عـنّـي
لقـيتني هنـاك جـواي مستنّي
راجـي الري فـي محلِّي يصلني
ضحِكتـا علي ودمـوعي بكنّـي
وأنا جواي بتوارى وأكنّـي
زي مظنون مفتون بكأنّي
بقيت جواي محبوس في ظنّي
سألتا سـؤال بالجـد محّنـي
أنا لمتين حا اعيش في جنّـي
وأعبّـي وأفرِّغ فـارغ دنّـي
أسيب الفيـل والضل يطعنّي
وأرضى الذُل من زول بهدلني
أجيب القيد أنا للكبلّني
وفي جواي ، جواي وكّرني
حت كضباتي الفيني هرنّي
وأصبح زيفي بيمرق مني
ولسا بقول لي نفسي أظنّي
وأهاتي علي اليوم داك كفّنّي
طال ما جروحي خلاص كفّني
ولسه براوح أفتِّش عنّي
ولسه بكون جواي مستنّي
وارجى الري في محلي يصلني