المكر لانكل سام في كل الاقطار

[الطائر المهاجر]

المكر لانكل سام في كل الاقطار = واللي يعارض ينتهي في سهوله
يلعب على كيفه بتحريك الاحجار = وينفّذ اللي بالجهر ما يقوله
مدفوع من صهيون في كل مشوار= ويخْدمه من يجهل نوايا فعوله
ويلعب على حبلين في سر وجهار= ويركض وراه اللي انخدع في طبوله
يخاف كل الخوف من شعب لاثار = ولا همه اللي ساعده في ختوله
من بعد ما هو يدعمه ..لابدا اعصار = يستبدله بآخر بلحظة وجوله
المصلحه تدفعه من غير انكار = ولا يعترف باللي خدم من خيوله
فالعاقل اللي من يقلّب للافكار = فمهما ارتفع لابد يومٍ نزوله
لكن اذا هو ذيب يدرك للاخطار= يعرف مصيره قبل يبدا وصوله
ويدرك شرار النار لو كانت صغار= لابد تكبر لو دعسها برجوله
ومن ينتقى من حوله ارجالٍ اخيار= يعطونه الواقع بعدل وميوله
يمشي بدربه صح مايوم يحتار = ويتبعه ذكر الطيب في كل جوله
ومن ينتقى بعض الحصاني والاشرار= يعموه عن دربٍ يحاول يطوله
ويشوهون لسمعته دون يختار = وكلٍ اناني كل همه ذلوله
وهو من يلام بكل تقصير وادبار= فالناس ما تبغى الحصاني الأكوله
ولاهي تقرّ الظلم من كل جبار = ممن يراهم ما يساووا نعوله
يستعبد ابطشه وهم خلقوا احرار= ولا يدري انه ينتهي في سهوله
يحرق مثل غيره مثل يبس الاشجار= ولا ينفعه من كان بالمكر حوله
ومن لا اعتبر بالغير يشرب للامرار = ومن لايخاف الله يرى ما يهوله