لاشفت لك دلخ لبس بشت غالي

[الطائر المهاجر]

لاشفت لك دلخ لبس بشت غالي= وقام يترزز في قنوات الاموال
لو قال رجل اعمال ماله حلالي= فانظر لوجهه تكتشف بعض الاحوال
الكاس لاعب به على كل حالي= ولو هو تمكيج ينكشف مثل تمثال
يخفي وراه اللي قحش للريالي= وحوّل ملايينه ولو لبس الاسمال
وجاب الجماعه من عمام وخوالي= وتمكنوا في الدار اجيال واجيال
حتى مسكوا في السهل ويا الجبالي =وعيالنا ضاعوا بلا دخل واشغال
وعاشوا علينا عالةٍ واتكالي= والبعض منهم طاح باسباب الاهمال
في شلةٍ فيها البلا والوبالي= عاداتها تسرق ولو نصل جوال
تعيش في اقلاع فوق الهبالي= بفعل المخدر ما تقدر للافعال
كم بيت يشكي من خميم العيالي= وكم من ولد بالسجن من خلف الاقفال
وانت السبب يادلخ سقط الرجالي= خنت الوطن منتاب كفوٍ للاجلال
اعطيت خير الدار لاهل الختالي= وسهلت ما يبغون حلٍ وترحال
ولا جاك من اولادنا بك تعالي = تبيه يخضع مثل هندي وبنقال
والا يوفّر لك بحمر الليالي = كاف وكاف تحسبه مثل الانذال
اللي لفونا من جنوب وشمالي = لا دين يحكمهم ولا شيمة رجال
لو هو بيدي او عطيت المجالي= لاصفي املاكك عقارات واموال
وابني مصانع ما بها من عطالي= تشغل شبابٍ عاطل طاله اهمال
واشغلك فراش ف الربع خالي= تكنس رماله ف العراء مالك ظلال
هذا جزا من كان فعله ضلالي= وخان الوطن واهله فلاهوب رجّال