ما انتم عرب يا مدعين العروبه

[الطائر المهاجر]

هذي كاتبه من حوالي الشهر ثم انشغلت بالمنتدى وقلت اليوم لازم اكملها وانشرها
لأن ماهي العاده اني اقعد شهر دون ما انشر شي


ما انتم عرب يا مدعين العروبه = ولو تلبسون البشت واغلا العمامات
ولا انتم زنوج ولا سلالات نوبه = ولا انتم هنودٍ ابدعوا بالصناعات
انتم بهذا العصر والفين كوبه = حتى ولو لجدودكم ماضيٍ فات
تلوموا الحكام في كل نوبه = وانتم سبب ما صار من كل علات
البعض يشكى ما نظر في عيوبه = يهوى التبطح ما يبي اي شغلات
إلا اذا هي ما توسخ لثوبه = تحت المكيف بين صحف ومجلات
ولا انهى دوامٍ ما درت به جنوبه= لل"نت" يركض يقضي الليل مابات
حتى غزونا من شمال وجنوبه = وصاروا هل الديره وحنا الجنبّات
تكاتفوا والكل قام بوجوبه = في جلب من يبغى وصاروا الوفات
وصرنا اقليّه ببحرٍ عبوبه= قامت تلاطم والبعض ذاق حسرات
فقرٍ وجوعٍ مقبلٍ مع هبوبه = ضرب عوايل مالقت شي تقتات
وبعضٍ تسلق بالمكر واللعوبه= واصبح ظهر للأجنبي في الملمات
يعطيه طفسه من حتاحت جيوبه= وتحويل لبلاده الوف الريالات
وبعضٍ اذا منه علا في رتوبه= كبّر لكرشه بالنهب والرشاوات
ماهوب ناشد لو تكاثر ذنوبه = المال خدّر ضامره لين مامات
المشكله فينا وهذي عقوبه = لأنّا تبطرنا بعد فقر وآفات
لابد ما نصحى ونعلن لتوبه = ونعرف حقوق الدار عن وعي باثبات
كلٍ بجهده ماضيٍ في دروبه= باخلاص من قلبه ولو عاش ويلات
دارٍ بليا رجال تصبح نهوبه = للاجنبي مهما اشتغل باي شغلات