مسكينه

[محمد اسماعيل الرفاعي]

تعبانه بتحرتي في بحرك عشمانه الغلّه تكفيكي
مسكينه مزاول لك ضُلِّك يا الدايره التلجه تدفيكي
وطلاسم قولك حيرانه لي نفسك يومي بتشكيكي
راجياك تدّلي وتتجلّي شان تشرحي ليها معانيكي
فرتقتي نسيجك بي نفسك حيرتي في لمّك ميكانيكي
والقول الطالع من قولك بيقوللك أرجي الراجيكي
وإبليس بي عشمو الفي الجنه متحفّظ خايف يباريكي
ضُلِّك في ضلك بتضارى متمرد مابي يحاكيكي
*****
يا الراميه وليدك في يمِّك خالف تحذيرك وإتبلل
بي موية ملوثه في المجرى لاذرف الدمعه ولا اتذلّل
مستني اللحظه البتزاورو تديهو الجرأه ويتحلل
من حِملاً شايلو علي كتفو يقرش في مُرَّتو والحنضل
قبال ما يغطس في نفسو ويذوب جواها ويتحلّل
ما القمر الباذغ ما شافو في دنيتو من عُمُراً طوّل
بيهاتي ويحلم يتنفس يمرق من هوتو يتجوّل
عاشق حريه ومتخوِّف واحلامو بتُسرق تتحوّل
وقضيتو العادله المحريه غصباً عن عينو بتتدوّل
وشليلو الضايع في الضلمه فتّشلو وعاود من أوّل
موسوم بالحيره وبالدهشه ما عارف كيف قولو اتأوّل
يا ناس أدوهو طرف خيتو خلوهو يقوم ما يتعلل
بالعوره الساكنه طرف بيتو ويادوبو الشافع صف أوّل
والداير الحق لازم إكاتل قبال الغول ما يتغول
الأحد 17 / 10 /2010م