العيد / هدية الرحمان

[ماجد الزيد]

العيد حلّ وله على النفس تأثير=ياما حلا محيّاه ياحيّ حيّه
هديّة الرحمان بعد التصابير=فيه النفوس الليّنة والنديّة
قلت استغلّه يوم جات التعابير=وانصح به اللي يحتري له هديّة
لا تندم إن سويت مع واحدن خير =حتّى ولو يجزاك بالخير سيّة
تحيا قرير العين ما مسّك الضير=كانك تبي بالخير رب البريّة
والغيظ لوهو شب صدرك دوافير=اكظم عليه ولا تردّ الأذيّة
سامح ولا تشفق تجيك المعاذير=تلقى بيوم البعث نفسك رضيّة
قد صح عن مسلم وكل التفاسير=عظم الثواب المن يسامح خويّة
لا تشيل في صدرك حقُوُدن على الغير=نم يا قرير العين نفسك هنيّة
تقدر تعزّر فيمن آذاك تعزير=وتحطّ في كبده ثمانين كيّة
بس إن عفيت الله عفا كل تقصير=ويغفر لك بيوم الحساب الخطيّة
قلب ٍ سعير وكنّ ينفخ به الكير=وقلب ٍ نظف من كوثر الخير غيّه
صدر ٍ ربيع وغرّد بدوحه الطير=وصدر ٍ محل فيه العواصف قويّة
الخيّر اللي فاق كل التصاوير=صدره سلام ولا حمل به رزيّة
عمر الفتى محسوب له يوم ٍيصير=تحت الثرى لا جندلته المنيّة
ما عوّدوا ربعه لداره مسايير=ولاله وليّ إلا فعوله وليّه
من قدّم الحسنى لقاها تباشير=ومن قدّم السّيات ياويل بيّه
ما ينفع المنكوب بالقبر تبرير=ولا ضرّ ظيف الله دنيا دنيّة
ومن كان يبغى الخير للعيد تأثير=ياما حلا محيّاه ياحيّ حيّه