ان كان منتب ذيب ما هابك الذيب

[الطائر المهاجر]

ان كان منتب ذيب ما هابك الذيب= ولا هابك اللي ماتهابه دجاجه
مهما تحضرنا نعاني من العيب = كلٍ بنفسه لو يضيع بدواجه
في غابةٍ ما تحترم واضح الشيب= ولاّ ضعيفٍ انكسر كالزجاجه
إلا إذا له واسطه كالمشاهيب = كلٍ يهابه يوم يقبل عجاجه
وهذا السبب كلٍ يدور معازيب= يحمون ظهره من معقّد حجاجه
ممن وصل عن درب مكر واكاذيب= وصار يتصرف بالكبر والهواجه
ولا جاه مندوبٍ لاقل المناديب= قام يتخضع مظهرٍ لإبتهاجه
فلاصار مالك "واو" عال المناسيب= سيفك لسانك قاطعٍ باحتجاجه
لاتستحي ويصير هرجك بتهذيب = مع من قوانينه توافق مزاجه
يمطها لا من توقع مكاسيب= ويشدها في وجه من جاء لحاجه
ولا جاء ملوسن كاشفٍ للمراقيب = يخاف يكشف ما خفى في لجاجه
ولاتحسبن الطيب يجلب لك الطيب = في وقت كلٍ فكرته في خراجه
وازن امورك واضعٍ كل ترتيب = فمنهو معك طيّب بطيبٍ يواجه
ومنهو استغلك في كثير المطاليب= ياخذ ولا يعطي ينمي نتاجه
فهذا اناني ما يكفيه تشطيب = يحتاج من يقلاه من فوق صاجه
لاتقول ولد امي وذا اقرب قريب= حبل القرابه كويته من علاجه
يرجعه إلى عقله ولو فيه تعذيب = وينفع هله من بعد فترة خماجه