أبكتب إحساسي

[ترانيم المطر]

أبكتب إحساسي وفي خاطري شي = شي إكتسبته وإقتبس منه فكره

أقولها من تجربه حاصله لي = الأمس ما أخافه ولا أخاف بكره

لا تابعه مقفي ولا تابعه غي = قلبي معرّف ماتبع كل نكره

نفسي عزيزه لو تحاليت للفي =ما أشرب هماج تمده إدين عكره

الطيب ما ينسى ولا فيه من زي = راعيه دايم للكرم شاش فكره

بعض العرب له وقفةٍ كنه الخي = وبعض العر ب ربي يكافيك مكره

وبعض القلوب تموت وإنسانها حي = وبعض العرب لو مات ما مات ذكره

والصقر لا يشوي ولا ينوكل ني =يكفخ ولا يقْرب من الناس وكره