ان كان ما تعشق ولا يوم حبيت

[الطائر المهاجر]

ان كان ما تعشق ولا يوم حبيت = فانته مماتك والحياة متساوي
لو كان جسمك حي فالقلب بك ميت=مثل الحجر مابه لحيٍ رجاوي
الحب يشفي الروح مهما تلضيت = يكفيك طيف اللي تحبه وياوي
مهما تعذب او من الحب عانيت= مثل الدوا مرٍ ولكن يداوي
ولا صار حبك عن عقل ماتصابيت= يرسخ مع الأيام ماجاه طاوي
وحب العواطف ينتهي لاتضاحيت = وبانت عليك الشمس بعد الغطاوي
فاختر حبيبٍ ينفعك لاترديت = يفداك روحه ما يخيّب هقاوي
يحس لو في صمت بالآه ونيت= ويسهر على راحتك مادمت ذاوي
ما يرتجي مصلوح مهما تقويت= يحبك لذاتك لو انك خلاوي
ومن مستواك ابحث ترى لو تغاضيت= بعض الفوارق دافعه للهزاوي
من اهل وإلا خل من غير توقيت = تنسف جذور الحب لو هو نقاوي