"" الأمجـــــــد ""

[عبدالعزيز البليهد]

لايخفى على الجميع اننا محسودين على مانعم الله به على بلادنا من انعام لاتعد

فبلادنا معين الشيم العربيه ولازالت ولا زلنا متمسكين بها ونحمد الله الذي انعم وتفضل

علينا بخدمة الحرمين . ابيات متواضعه اهداء للوطن وردا على كل حاقد.

صوت البلابل... والنسيم وشذا الورد = للمترف اللي ماوطى الشوك حافي


ما عاشها المسطور وحنا ياأهل نجد= اللي خلقنا يا بسين الإشافي


كل يجوع وجوعنا أشد واقرد= تشبع إليا صمنا السنين العجافي


فزعتنا بالجوع والفقر والبرد = شيمة عرب ما غطلمتها السوافي


ناطا الكتاذ وكل شايك لنا خد = ويوم إعتلينا المجد ناعد ونافي


ما غرنا نصراً تحقق ولا مجد = ولا حنا على الدنيا شفاقاً خفافي


حنا ركزنا العز بالجلمد الصلد= وتفجرت نجد الوفا جم صافي

حنى السعوديه ولا فخر (الامجد )=حنى سنام العز كامل وضافي

الحمد لله نعمته ما لها حد= نجود من جوده رضى ما نخافي


أحرار ما زلنا ولا أحد تسّيد= بأرض الجزيرة غير حراً سنافي


حنا بدو ننزل على عز وإنشد = نسل الصحاري للكرامة فيافي


قلته أذكّر ...هافي الخال والجد= اللي يقول المجد جاكم جزافي