الرجل من صحْبته واللي يخاويه

[الطائر المهاجر]

من صاحب الأجرب على الحول يعديه= ومن صاحب الخيّر نجح في اختياره
الرجل من صحْبته واللي يخاويه = فاختر رفيقك صقر ماهو حباره
رجل نظيف وثابتاتٍ مباديه = عقلٍ ودين ما مشى في الدشاره
دينه بقلبه يحكمه في مماشيه= يمشي على سلوم العرب في مساره
ماهوب من بالدين يخدع لْموحيه= لامن تكلم قيل كله طهاره
وهو خبيثٍ فاسدٍ في تخفيه = ماشي بدرب الغي ظنّه شطاره
يوهّق خويّه في المتاهات يرميه= ويكشف لْسرّه بين ربعه وجاره
حتى يطيح بعين خلٍ يواليه= ويصير ماله كرت نفو بدياره
صاحبك من ينصحك والنصح يمليه= دينٍ بعقلٍ مانقصه الجساره
ولو يزعلك ماخاف يومٍ تخليه= ولا هوب من حسّب لربح وخساره
همه يشوفك رجل يعرف مواطيه= له احترامه لو يؤشر اشاره
فخلك حذر في وقت بانت مواريه = ماعاد تدري مين ساير وساره
وقتٍ به الشيطان مفلوته ايديه = يرقص على انغام الغوى في الحضاره
ويجيّش جيوشٍ تخدمه وترضيه= من كل رجلٍ ما درى بانحداره
والعاقل اللي من يحسّب خطاويه= ويحسن على طول المدى باختياره