كم واحدٍ حطوه في قبره وباقي له حقوق!!

[سعيد مقبل الأكلبي]

كم واحدٍ حطوه في قبره وباقي له حقوق=وكم واحدٍ راحت حقوق الناس في قبره معه
ياللي تبوق الناس وش رايك نسميك السروق=والا بعد ماودّك ان الاسم هذا تسمعه
لكن تعال نشوف وش فرق الكذوب من الصدوق=ويبين هرج الموقف الغصّاب من هرج السعه
يمكن تتوب من الجرايم حقّتك والا تفوق=والا مهفّ مقيط وارشا امقيط واللي يتبعه
بكره ليا باح الكلام ويبست ارياق الحلوق=ووقّف على بابك رسول الموت محدٍ يمنعه
الناس من حولك وكلٍ هابطٍ له بطن سوق=واقربهم اللي قام يدعي لك ويمشي مدمعه
وجاك الملك من بينهم يسوق فيك الموت سوق=وانته تعاين فيه لاكن مانت قادر تدفعه
هُم قام ينزع روحك اللي جوّدت معها العروق=وانّست حُر الموت في قلبك قبل لاينزعه
والتفّت الساقين والتمّت عراجين العذوق=وجا عند زورك من عظيم الكرب صوت وقربعه
وراح النظر يطرد ورا روحك ويلحقها لحوق=وقرّت عيونك في السما والروح راحت مسرعه
واصبحت في قبرك قبل لايبتدي وقت الشروق=من تحت سطح الارض في حفره قليلة لذرعه
يعني كذا خلاص ماتقدر تغش ولا تبوق=ولا يفيدك لا حلال ولا تفيدك مزرعه
راحت حقوق الناس في ذمَتْك طوقٍ فوق طوق=ياكيف بعد الموت حق الناس تقدر تِرْجعه
المال ياخذه الولد وان كان في قلبه عقوق=ينشد عن ايام العزا ثلاثةٍ والا اربعه
مادامت القوه ولا عمّر على الارض امخَلوق=الادمي مهما يطول العمر يلقى مصرعه
هذا كلام العقل والمنطق وثقنا به وثوق=وان كان راسك ما اقتنع به حاول انك تقنعه
والا ترا الذمة بريّة منك واصبحت امحَقوق=وان كان ودّك بالسلامة فاسمع الشور وطعه
بعض العرب لا شفت جَرْيه قلت عز الله سبوق=يطرد ورا الدنيا ولو حاش الذهب مايشبعه
عينه على اللي عند خلق الله وفي قلبه حروق=لو كان يقدر كان حتى الما عليهم يقطعه
مايدري انه لوقعد يجمع من المال ويحوق=مايجمع الا اللي كتب ربي له انه يجمعه
الله قِسَم الارزاق يوم اعطى المزايا والفروق=وما فيه نفس الا لها رزقٍٍ وفيها منفعه
والا من اللي علّم المولود لين اصبح يذوق=من علمه يلقى حليب امه ويقدر يرضعه
اللي يبي يرتاح في غير القناعة لا يتوق=يرضى بمقسومه ولا يتبع هواه ومطمعه
والرابح اللي راح في قبره وباقي له حقوق=ماراح في قبره وكل حقوق خلق الله معه