مغلاك

[حمود السكراني]

محلاك ياعشق النجوم البعيدات = مغلاك ياكنوز الجبال الرواسي
البارحة جفني سرى الليل مابات = لجلج غلاها مانفع فيه ياسي

ماهو رجاء بس أمنيات وخيالات = فيضٍ طفح بي ماقواه احتباسي
ذكرتها مع ذكرياتٍ قديمات = قبل يطوف الوقت ويشيب رأسي
ماهو غرام اللي على صفحة الشات = ولا هو زمن وقت الخنا والمآسي
هيهات مايرجع به الفكر هيهات = هيهات ياشوق الصبا والحماسي
ياما قطعنا له بعيد المسافات = وضح النقا مهتز للبعد باسي

على الطهارة والعلوم الشريفات = ماهو على ذيك العلوم الخساسي

والله ما وافيتها غير نظرات = ولا تلامس ملبسه مع لباسي

لحظة قباله وقتها بألف ساعات = وضحكة حجاجة مذهلة كل قاسي

معها كأني مالكٍ للمجرات = والكون لي وجملة الناس ناسي

وراحت ورحنا والذي كان قد فات = والمشكلة بالقلب ماهو بناسي
رغم البعاد ومامضى من سنوات = مازال في قلبي يدق المراسي

مازال حبه داخل القلب مامات = دايم على ساحل هوى القلب راسي