يارفيع الأصل والهرجه

[مجدي صالح المبارك]

كتبت هذه القصيدة على ضوء قصيدة أخي القدير الشاعر ( ابراهيم حمد ) وهي قصيدة " ياعلي طاروا مع العجة " والتي أتمنى أن تكون أهلاً لمجاراة أبياتها الرائعة ومعانيها الجميلة

قصيدة الشاعر ( ابراهيم حمد )





ياعلي طاروا مع العجه=ناس مافيهـم شقرديـه
آه واويـلاه كـم لجـه=نوّخت بالفكر عصريـه
ماصبرت وصابني رجه=لعنبو من شيّـن النيـه
قلبي المخذول به سجـه=من سبايب راعي السيه
يحسبوني اطرش الصجه=و داخل المعلوق به كيه
مامشى صاحبك بالدجه=عارفين البيـر والحيـه
من تكبر خلّـه ابرجـه=لاهـلا فيهـم ولا حيـه



ومجاراتي لها بقصيدة " يارفيع الأصل والهرجه "





يارفيع الأصل والهرجه=هالزمن مافيـه حنيّـه
الوفا رجله غدت عرجه=والخيانه ماليـه الدنيـه
كم صويبٍ حالته حرجه=انطفى وسط الملا ضيّه
القرايب عنه في حجـه=لا أبو يفـزع ولاخيّـه
والحبايب تطلب الهجـه=لادرت للدار لـه جيّـه
مالك بهالوقت من رفجه=ومن تكبر خلّـه بغيّـه
سامي الأخلاق في نهجه=مايهمه من قلـب زيّـه