صاخر المعنى

[ناصر عبيد الهواوي]

على رد القصيدة صاخر المعنى لقيته راد=بمعنىً شدني فيما يقوله والمحرر زيد
على معناه سريت الركايب لو يطول الماد=لك الله حافظٍ رقم الورود ومثبته بالقيد
خلاصة ما كتبته جادت الفرصة بلا ميعاد=بلقيا من خطف كاس البطولة في جمال الغيد
عراقي المحاجر هرسكي الخد لون اكراد=دمشقي الحلايا مصري المنطوق تلع الجيد
قبل عامٍ مضى فيلمٍ من الماضي بغى ينعاد=بقصه حال دون احداثها عشرين عيد وعيد
دخلت وقد لبس قلبي على ذاك الوليف احداد=وكنت اظن شوفه مستحيل ولي لقاه ابعيد
وبالصدفة لقيته جالسٍ في مجلس الأجواد=ووقف مبهور قدامي وقال اليوم يوم اسعيد
وانا ما كان لي من بُد غير الما يريد انقاد=وعجزت ارد له كلمة سلام ولا قويت ازيد
وخضعت وصار ما قلته قبل .ماله لزوم ايعاد=وانا ما ودي انه صار.لكن صدق كنت اريد
وتباعدت الكنب لااطيح دونه وآصله بالكاد=مثل من شاف له شيٍ مخيف وخافقه رعديد
لكن لي شيمةٍ ترد قلبي للسنع لو حاد=وكبدي لو تذوب من الكمد عما يشين احيد
وانا جميع ما اكتب صدق لكن في زمانٍ باد=سواة شعيل فالمبرك يردد جرته وايعيد
هذا معذار من شيب الشيوخ وشبة الأولاد=شغاميم الرجال الطيبين العارفين الصيد