الشاعر / عبدالله بن زويبن الحربي

[الفريدي]

السلام عليكم ورحمة الله وبركاته

قصيدة للشاعر / عبدالله بن زويبن الحربي



سمعت لي كلمةٍ مدري وش أقصاهـا
حزت بصدري وانا مانيب هارجهـا
لو كل كلمة اليـا جتنـا طردناهـا
بعنـا الثمينـه بسعـر مايخارجهـا
ومـن يـم هـذا لهـذا مانقلنـاهـا
والناس واجد وتلقى مـن يروجهـا
من جابها بيـن خلـق الله ووداهـا
لو به مراجل تـرا نفسـه يسمجهـا
من عامل الناس في سابق خطاياهـا
يقعـد بـدارٍ خـلا مـاداج دايجهـا
في كنةٍ تشوي الجربـوع رمضاهـا
تيبس غصون الشجر من حر واهجها
والناس بالحق حكم الشيخ مارضاها
ماترضى النـاس لوأنـك تحججهـا
ياللي تبي الطيبه خذهـا وعطناهـا
وخـل الطريفـه طريـه لاتثلجهـا
وأقضب طريق الاوادم وامش ممشاها
واتبع دروب العرب وادرج مدارجها
وارسـم لنفسـك حـدودٍ لاتعداهـا
من حط نفسه بدرب الضيق يحرجها
وان كان نفسك هواها قـام ينحاهـا
حط الاعنه بروس الخيل واسرجهـا
وفكـر بمنكافهـا قـدام مغـزاهـا
واضرب حساباتها وتشوف ناتجهـا
وكل بعضده يموح الدلـو برشاهـا
وتلقى كبود الضوامي مـن يبهجهـا
وان صدت الناس عنا ماعترضناهـا
ماتقفـي النـاس عنـا ونتولجـهـا
وان جاتنا الطيبه بالطيـب زدناهـا
الطيبه بالعسـل والسمـن نمزجهـا
وان جاتنا الثانيه نصبـر ونرفاهـا
يمكن اليـا فـاق راعيهـا يعالجهـا
وان عادها عودتن ماعـاد ينساهـا
من حربتن في صميم الصدر نولجها
مسمومتن يبلـش الدكتـور بدواهـا
مايقنع الخبـل ليـن انـه يلامجهـا