الا ياطيب منجوبٍ كفاني يافهد شره

[فواز الغسلان]

الا ياطـيـب مـنـجـوبٍ كـفـاني يافـهـد شـره=مدام الروح ماذاقـت بمـيـدان الندى خـيره
اذا مافـاد راع الـطيـب بالـهــرجـات ماضره=ولا دلا يحـط الـكـذب والـبـهـتـان فـي غـيره
اذا بان الـنـدى بـأقـرب ربـوعـه للردى جره=مع ان الـهـرج مايجـدع عــزيــزٍ طـايـرٍ طـيره
يـبـي مدحه وهو لا جـاه قـرشٍ بالردى صره=وراح العـمر في طـقـة بـلوت وراس تعـمـيره
ولو جـاه الـيـتـيـم الـلــي شكى دنـيـاه ما بـره=ويـبـدى اللي يـريـد الـعـون في كـثرة معاذيره
واذا شاف العرب ترفض هروجه عاود الكره=ودرب الطيب مايـهـفـــيـه نـذلٍ بـان تـزويـره
هـنـي اللي اليا شاف الزمان الشين ما سـره=ركب جيبٍ جديد الصنع ماطـاحت مساميره
اذا شاف الطعوس الحمر بالعالي ضـغـط زره=تقول انك سقيت الجيب والسايق من الـبـيره
ولو ياطى عـفـاش الـدرب ماحاسب ولا فره=ولا بدل خطوط الدرب يـبـي الهون في سيره
عطـاك الطيب من زبدة وخـبـرة صـانـع الذره=وجــابــه واحــدٍ مـاهــاب من كـثــرة دنــانـيـره
طريـقـه يـطـفـي الـهـاجـس بكـبـدٍ قابـسٍ حره=سبـب زولٍ يـشـل الـروح في كـشخـة تنانيره
غزالٍ حاز عـقـل وثـقـل وزيـن الوجه والغره=جروحه ماتـجـي بالـفـحص فـي ناتـج تـقـاريره
نـزوله في جـبـل شـمـر وبـيـتـي مـع بـنـي مــره=رجالٍ من سلايـل يـام نـعــم الـطـبــع والـجـيـره
ولكن الـضـمـايـر صــوب دار الــزيــن مـفــتـره=تقول الـبـعـد فـي وسط الحـشـى يركي مناشيره