فشار وكراميل خخخخ

[نجود]

: تدرون عاد امس من الطفش قعدت احوس بالبيت وشفت البوم الصور يون اننا صغار وقعدت اتذكر هالأيام (وش زينها من أيام)
طفولتنا كلها براءة مب مثل هاللحين على قولة اختي الجنين يطلع من بطن امه مراهق على طول..


المهم شوفوا الفرق


ألعابنا والعابهم:
مكونات العابنا أعواد الكبريت +الحصى(للمصاقيل اللي لين اللحين ماعرف شلون نتلعب )+قواطي بيبسي(طوروا هاللعبه وخلوها بولينق خخخ)+أي شيء بسيط نلاقاه بالبيت
والا التراب نلعب بالتراب بيدينا مب مثل هاللحين ياربي لك الحمد والشكر مطلعين حفارات وأشياء تشبه الملاعق والشوك خصيصا للعب بالتراب..
والله 2007 ذولا..


وكنا اسم الله علينا رشاقه ماكان لا فيه لبن اكتيفيا ولا شيء كله من المطارد والله
اما اللحين البزارين عند البلاي ستيشن وبس جالسين وياكلون هذا همبرقر وهذا برينقلز
وحنا يحول على ايامنا ريكو وفش فاش ومنتجات غندور وحلاو بقر
<< تموت بحلاو البقر الأصلي مب التقليد..

والا عسكريم (اقصد آيس كريم) ايامنا 4بريال لا ويجي معه هديه بعد مب اللحين كون زون وباسكن روبنز (حتى الأسماء مال امها داعي)


وكنا نجيب المويه من الوادي مدري من البير ومعنا ذيك الجرار(جمع جره)
خخخخخخخخخخ وحده نصابه ..حشى مسلسل بدوي هو.
مب اللحين أشكال وألوان علبة كبيرة وصغيرة وأصغر بعد..
والله عـــــــــــــــز..

والا باربي وفله وهالخرابيط اما حنا يجمعون بقايا الاقمشة ويخيطونها لنا ونموت من الوناسه تقولون مالكين الدنيا ومافيها..

والا افلام الكرتون جورجي وليدي وسلاحف النينجا وكابتن ماجد والنمر المقنع
والا هايدي..يالله بس
اما هم استغفر الله
ابطال الديجتال ودراغن مدري دراقن بول وهزيم الرعدو....وخرابيط


والا مسلسلاتنا اول
وخصوصا البدويه يجيبون لك شامي ويلبسونه ثوب وشماغ ويالله اسمع كلامهم يموت ضحك والا البنات السوريات بس اسمعهن بالمسلسل وش يقولون ياولد القبيله ..يابن عمي.. نخيتك خخخخخخخ
قسم بالله تسدح ضحك..
خربوا حكينا الله ياخذ ابليسهم..


وبرامجنا
سلامتك ..سلامتك..نود لك سلامتك لأنك الأنسان تعمر الأوطان نود لك سلامتك..
هذا اول مايبدا تلقوني مسنتره عند التلفزيون..

من جد فرق بينا وبينهم..

والا قنواتنا السعوديه الاولى والسعوديه الثانيه..
اما اللحين الاولى والثانيه لا بعد الاخباريه والرياضيه (والله تطوروا)


والا اول كنا نستخدم الفوانيس مب اللحين ثريا واباجورات
خخخخخخخخخخخخ
شكلي زودتها



والا عيد الأضحى كانوا الرجال يذبحون وحنا البزارين فارشين سجاده وجالسين نتفرج عليهم مب مثل بزارين اليوم لو يشوف دم بطرف اصبعه يقوم الدنيا ولا يقعدها ( كل الدعوة صيغة مبالغة خخخخخخخ)

حتى الأسماء غيروها
بدال مايقولون فشار يقولون بوب كورن(اللي بيسمعني اقول بوب كورن بيحسبه ممثل اجنبي خخخخخخ)


حتى الجالكسي اللي بالعسل يسمون جالكسي بالكراميل
لا وبدال مايقولون نفيخه يقولون بالونه
ياربي لك الحمد
لا ومعنا وحد بالشله تقول بلالين مب بلونات
استغفر الله بس
والله حتى اللغه خربوها..


لا وبدال مايقولون كاكاو يقولون شوكالاته(مير انا لا قلت شوكوالاته احس اني اجنبيه خخخخخ)

لا والعصير المشكل يسمونه كوكتيل خخخخخخخخ

والا الفش فاش يسمونه شيبس ياويحي ويحاه
خخخخخخ


والا اغانينا سعد العبد الله وحجاب وعتاب
مب هاللحين وائل كفوري ورامي عياش واليسا(وجع يوجعها)


والا العيديه اللي يعطونا ايها خمسة على عشرة ونفرح فيها وفي اغلب الأحيان ريال خخخخخخ
مب اللحين خمسين ويالله ترضيهم


سبحان اللي يغير ولا يتغير
وش كثر اشتاق للأيام الخوالي
حلوه الخوالي يانجود
وعلى قولة السنافي طفولة مدري نبكيها والا هي تبكينا..