وا عذابي كلّما اسدل الليل السّدول

[ماجد الزيد]

السّلام عليكم ورحمة الله وبركاته
مرثيّة للحال لفراق ابن العم
تركي بن احمد الزيد
رحمه الله تعالى
دعواتكم له بالرّحمة والمغفرة
http://up.fatahilah.com/up//uploads/432fe4ce90.jpg
http://www.bni5aled.net/uploads/files/bnikhaled-97214af389.rm


وا عذابي كلّما اسدل الليل السّدول=والذّيابة من همومي تعوّي بالدّبيل
قمت افتّح في عدول ٍ واسكّر في عدول=وفي خفوقي صيحة ٍ كنّها زمّار فيل
استقامت بي ضلوعي وحلقي ومغلول=عبرة ٍ لوما تراق استويت لعزرييل
قمت اجاذبها وهي في وسَطْ صدري تجول=وا عذاب اللي يبي دمعة ٍ عيّت تسيل
انحجر دمعي من الهول ولا له من نزول=الفجيعة ورّدتني على الليل الطويل
ويش ابيّح يالقوافي لك الله ويش اقول=والحزن برّك ولا لي سوى الصّبر الجميل
المنيّة صابحتني تقود الها ذلول=وقْفت بقرم ٍ فلا له بجيله من مثيل
حين يقدم في قدومه كراديس الخيول=وحين يقفي ما يعبّي فراغه من نزيل
لا تكلّم تسكت القوم وفعوله فعول=ون تحرّك له حنت راسها شمس الاصيل
الاصيل , يقول ويقول ويقول ويطول=هيبته من صغْر سنّه ليا شبّ الفتيل
الخويّ الوافي الخالدي فحل الفحول= النّوايا لو يميلن, نزيهن ما يميل
يحفظ العشرة ولا هو على صحبه عجول=حكمة الشّايب على حنكة الشيخ الجليل
الصّبور الحافظ الله والعبد البتول=البشوش السّمح في صحتن ولا كليل
بسمته تنبيك عن ليث في صدره يصول=ما يروّضْه المرض مركي الحمل الثقيل
حال حولن باثر حولن وحولن باثر حول=وابتساماته على قوّة الباس الدليل
يا لمنايا ما استحيتي وهول الفقدِ هول=شيّب بعيني فراقي ولد عمّن نبيل
كوكب تْضمّه سما فوق الاكتاف مْحمول؟!=بدرن يْنير الدجى وانطفى ماله بديل
تركي اسمع نبرتي , ضيّعت قرع النّعول=النّحيب نْحيب قلبي ودمعي بالشليل
شفْت نجمك طاح في قبرك وجاه الافول=لااا, حشا قبرك علا صار لسهيل ٍ قبيل
انظره ويطيح دمعي على خدّ الذّهول=والكواكب تقترب لي تعزّي في خليل
وش تعزّي ؟ والحزن كنّه جْيوش المغول=والصّدر بغداد فيه الجنايز كالمسيل
لولا سلمي والعوايد على حسْب الاصول=ما تقبّلت العزا لا كثير ولا قليل
منعصر قلبي عصر كنّ به ناب ٍ أكول=يا سباع الهمّ كفّن عن القلب العليل
وا عذابي كلّما اسدل الليل السّدول=ما ظلامه غير ظلمة وسط لحد النزيل