من بَعَض رسايلي !!!

[سعيد مقبل الأكلبي]

خلِّوني ارقى فـالسما بارايلي= والقى وسيلة الاتصال الهايلي
اللي تقوله شَرِكات التقنيه= في هرجها المعسول والمتحايلي
ياربعنا تعاونوا في نهبنا= ياشركة الجوال والموبايلي
هذا المواطن جوّدوه بفطحته= لايفوتكم هذا السمين الحايلي
كلٍ يعشّي في جنوبه ينهشه= القلب مفضوخٍ وحجمه عايلي
باقي مكانينٍ على فقارته= تلقونها خلف السنام المايلي
اقضوا عليه وريحوه من الشقا= لاتطاولونه بالطويل الطايلي
ياكم وطاه من الخساير والعنا= من سوق الاسهم يوم جا متهايلي
ومساهماتٍ في الهوى راحت سوا= طاروا بها لكن ماني قايلي
خلَّو حياة الناس قاعٍ صفصفا= ماعاد تلقى في الوجيه سمايلي
وتجارنا في حقنا ماقصّروا= من حبهم فينا لقينا مايلي
اركوا علينا ميسمٍ ماينطفي= احر من صالي لهيب القايلي
كلٍ علينا قام يرفع سلعته= ويقول ماجا في طرف مخباي لي
والبدو جاهم حقهم في برّهم= الشاه تبكي والبعير يخايلي
يشكون حر الجوع والله ربهم= يالله دخيلك من نعيمٍ زايلي
شيٍ ذكرته يوم جا في خاطري= من بعض الاشيا اللي تعبّي فايلي
والناس مثلي يشتكون من الغلا= هوايل العالم مثل هوايلي
اكتب رسايل في هموم المجتمع= وهذي رساله من بَعَض رسايلي
وان كانها ماجت على حسب الطلب= خلوني احوّل واجيب ارايلي