البعض من قصائد الشاعر / احمـد الجريفـاني

[دايود صالح الخلف]

السلام عليكم ورحمه الله وبركاته


حبيـت اني اضع لكم بعض قصائد الشاعر الكبيـر

احمــــد الجريفـــانـــي ..

ولعلهـــا تنال على رضــاكم :



على النصيحه عشت يا فاعل الخير=نصيحتـك خلـت بنفسـي كاابـه
كان انت فاعل خير وتحس وتغير!النصح وفق اسلوبكم وش لنا بـه!
وينك عني من قبل ما اطيح با البير=وينك عن اللـي قطعتـه الذيابـه!
لو ماانت شامت قلت لك سم يا سير=ونصرتني يوم افتقـدت القرابـه!
انته لك اسلوبك وانا مرجعي غيـر=ولا انت الذي يملي علـي الكتابـه
تعرفني مانـي بشـروى طراطيـر=مثقـف وكلـش محسـب حسابـه
وعشت الفقر واليوم ضمن الهوامير=وبنيت لي قـدر ومقـام ومهابـه
با المنتدى توكل اذا تحسب صغيـر=قانونهم با النـت قانـون غابـه!
قل لي من انته لجل تحضى بتقدير!=اكشف لثامك يـا مخفـي جنابـه!
تقول لا قابلتـك اعطيـك تفسيـر=ماني ( وغد ) ما دام فيني نجابـه!
( من اصدقاي اول ! )وتغليني كثير=وانته مثـال المرجلـه والحبابـه!
الحكي غير وفزعة الاجودي غير!=وكلن على طولـه تفصـل ثيابـه!
رد الرساله صعب يا فاعل الخيـر=مادام شخصك سكر قفـول بابـه!




يللي نويت تنام تصبح على خيـر=خل السهر للي همومـه كثيـره
للي بنى جرحه بقلبـه مقاصيـر=يبكي غلى ديره وهو وسط ديـره
خله لمن ظم الدمـوع المحاجيـر=ما ظمها يا كود ما شاف غيـره
خله لحزنن في بلد تشوي الطيـر=والسيف فيها ما يغـادر جفيـره
خله لمن قلبه غدى كنـه الكيـر=يرجف كما رجف الخيول المغيره
نم يا بعد روحي ترى مهجتي غير=عسى الوساده تحت راسك وثيره
نم خل عشاق السهـر للمقاديـر=الصبح ينبيك الخفـى والسريـره
طيف الجروح اللي كلته المشاوير=مكسور قلبه ما لقى لـه جبيـره
ما يطربه كثر الصخب والمزامير=ولا يضيـر ان الحبيبـه فقيـره
السر لامن صار ما ياسعـه بيـر=لا تزعل ان خانتك كل العشيـره




يا الله يا غفار يا عالم اسرار=كل البشر واقدارهم في يدينه
انت الذي تكتب لنا طول الاعمار=وانت الذي تختار من حان حينه
حنا عبيدك وانت ربن للاقدار=محدن كفر بك وانت رب السفينه
يا عزوة المضيوم يا عضد الاخيار=يا الواحد اللي ما بحكمك غبينه
انك تبدل تارك الدار في دار=جنات عدن ومن لجى لك تعينه
يا واحد لذنب المخاليق غفار=تبري جروح اللي جروحه مهينه
يا عزوتي لا يترك الجرح تذكار=بي مثل ما بك والمواجع دفينه
في مهجتي مثلك غرابيل واكدار=لكن مع الوالي حبالي متينه
مرت ثلاث عقود في غبن واعسار=لكن فرجها واحدن مرتجينه
وبمفارق امي با الطعش عشت في نار=وابوي قبله كلنا فاقدينه
وحبيبتي راحت بلا سابق انذار=في عز عمري دوك روحي رهينه
عقبه يزاول لي ومليت الاسفار=اشوفها في كل ورده حزينه
من فارق الاحباب من نار في نار=نار الفراق ونار تكميل دينه




شفتك معه تمشون بالسوق واغضيت=ذكرت حـبن بيننـا كـان عـذري
والله لو تدرين وش عقـب سويـت=ما طاوعك قلبك علـى شيـل وزري
انتـم تعديتـوا وانـا مـا تعديـت=عجزت اسير وضاقت الارض حدري
انتـي حسبتينـي لمحتك وقفيـت=وانـا شجوني ثايـراتن بصـدري
ردتني الصدفه لوقـتن تناسيـت=يوم ان حبك با الشرايين يجري
ايام فيها حبنا عالـي الصيـت=لا واحسايف حبنا ضـاع هـدري
نسيت وقتن فيه لا زرتك البيـت=تبدأ تهللي يا بعـد كـل عمـري
نسيت قولك يا بعـد حـيِّ و ميـت=عاهد واعاهد لا يجي منـك غـدري
نسيت حلفي يومي اقسمت واثنيـت=اني ما خونك وانت بالحـال تـدري
وعاهدتني واخلفت وانكرت واشقيت=وانا احسب انك عارفٍ ويش قـدري
يا ما على بالـي ودنيـاي عزيـت=وياما فديتك باجمل ابيـات شعـري
ياما من ابيات الغزل فيـك حطيـت=اتخيل انـك نـاوين يـوم هجـري
ظني صدق جاني خبر ويش سويت=انت برضاك اظلمت ليلي و فجـري
لا تعتذر ما لك عذر لـو ترضيـت=عمر الهوى لا ضاع ما فيـه بـدري
ولا تسكب دموع الندم والتناهيـت=وانت السبب باللي جرى لي ويجري
كان انت مستانس انا مـا تهنيـت=يشهد على شكواي دمعي وسهـري
وان كان حظك جاب لك ما تمنيـت=انا حظيظ بـزود حلمـي وصبـري
يللي علـى حـبِّ عزيـزن تعاليـت=لا تذرف دموعك على جـال قبـري