الوصية

[حمود السكراني]

آمنت وماشاء الولي فيه جايبه=والمقبلات بعالم الغيب غايبه
نزرع ونتعب ياعلي نرجي الولي=والله مايخيب رجاء حي طالبه
ياعلي أبوك يوصيك وأسمع وصيته=لاخير بغلام ماسمع قول شايبه
من قبل جدك خصني في نصايحه=علمني صروف الزمان وعجايبه
مرحوم ياعود(ن) قضاها على القسا=يحث على دروب المراجل مطالبه
يسري مسار الذيب إن حده الزمن=صحراء النقب تشهد مواثر ركايبه
كم قال لي يحمود حذراك ذلها=من ذل نفسه فارق العز جانبه
وكم قال لي يحمود حذراك قلها=ترى القليل بالمدح قليله مكاسبه
ومال(ن) بيديك ولايحوش الجميلة=تراه مثل عد(ن) ملاح(ن) مشاربه
وكم قال لي لاتعيل تكسب ملامه=ومن عال عليك يدري أنهض وحاربه
والناس فيها طيب الفال يافتى=وفيها الذي مادسم الطيب شاربه
من قدم الطيب له المدح والثناء=ومن هم بك أدعس برجليك غاربه
والعفو عند المقدرة لاحصلت لك=ولا تراه ذل(ن) لياصرت هايبه
أشوف لي ناس(ن) تبجح وتزتبر=في عصرنا الذي استفرست به ثعالبه
تصعب عليهم الطايلة لو بغوها=ماكل رجال لوطلبها تصاحبه
لها رجال(ن) هم أهلها لياقبلت=ولا عن عيون المساكين غايبه
رجال تصنعها بيديها شكاله=في دمهم من سالف الوقت ذايبه
ولا ردي الأصل لو أقبلت له=لابد ماتظهر عليها مثالبه
وأنت مقام الرأس من موقع الجسد=طابت لهم ولاعلى غير طايبه
من لابة(ن) تاريخهم شاهد(ن)لهم=يشهد لهم جور الزمان ومصايبه
وان كان كل(ن) أفتخر في خواله=أنظر سماء ترى خوالك كواكبه
لامن دعاهم واجب(ن) ماتعذرو=وعلى العداء سيف(ن)قويه مضاربه
ولازمانك يازمان السلامة=أمن ورخاء وإنصاف والدين حاجبه
ويبقى قوي البأس من منبت الساس=والغيث ينزل ياعلي من سحايبه
ياعلي أعلم من بغى منك معذرك=واللي تنصاك لاتقصربواجبه
لولا العشم بك ماعنا لك مسير=ولولا الخمن ماجالك لشيء راغبه
حذراك من قولة عنى مالقى شيء=وحذراك قولة ماوفى بحق صاحبه
وترى الخوي من الأخوة وحقها=ماجاد به الحربي وتحمل مصايبه
يوم خيروه يافيه أو في خويه=أختار عنه الموت ولايقال خان به
ياعلي عشناها ولو ماانصفت لنا=نقاسي زمن ونعزها عن معايبه
تغير الأيام ماغيرت بنا=شم النفوس اللي على العز دايبه
نصبر ولو الصبر مر(ن) مذاقه=ونرجي الكريم اللي جزيله وهايبه
تجري بنا الأيام وتجري بغيرنا=وختامها قبر(ن) تركز نصايبه
ولاباقي الا طيب الذكر ياعلي=والمسعد اللي طيب الذكر جايبه