خطك وصل

[ابو أنس]

قصيدة البدء ....
من صاحب فاضل يعاتب من وجهة نظره بعض الأمور المتعلقة بالعمل صاغها حسب رؤاه وما يرغبه من جانب ما يعرفه ويريده. ولم يجانب الصواب كثيرا فوجهة نظره مقدره ولكن ما يخفى أكبر مما يعلم وما يراد لايدرك كله وعوائق العمل كثيره كثيرا ما تتصادم مع رؤانا ومتطلباتنا التي كثيرا ما يكون دافعها المصلحه الشخصيه الآنيه دون رصدٍ للأبعاد والنظم والقوانين.
القصيده بعنوان ( آلام وآمال)يقول.........


كتبت لك ياصاحبي وانت عرّيف=لك في الشعر حاضر ولك فيه ماضي
يابن حسن دقق على الكم والكيف=وتدقيق مثلك ما عليه اعتراضي
واللي يدقق يكتشف شي ما شيف=عطشى واشوف القوم دون الحياضي
شيبت من شي(ن)تعدا التواصيف=يوم استثرت الشعر جاوب وهاضي
بناتنا تحتاج نظره وتخفيف=شوف النتايج كلها بانخفاضي
في دربهن للمجد شافوا صواديف=الكيل من كثر الصواديف فاضي
كم فرقة تدرس وشافت من الحيف=ويسلّكون امورهم بالتغاضي
وان عرقلوا مسيرهن بالتكاليف=وضيِّق عليهن ياسعد من نقاضي
راعي الوطن في ديرته كنه الضيف=عجزت اميز بين سود وبياضي
ياكثر ما نسمع عن الغش والزيف=ولاطاف وقته قلت اسامح واراضي
بعض القلوب السود تحتاج تنظيف=عسى الحيا يسقي السهل والفياضي
وبلغ ..... شكري وحبي بتلطيف=جهد الحكومه لاجلهن راح فاضي
نبي نجاح(ن)فيه ميزه وتشريف=وش فرق شقرا عن بنات الرياضي

الرد..........

خطك وصل وانا قريته على الكيف=فنجان بن(ن)يقعد الراس ماضي

يطرد عماس اللي بدا به خذاريف=صارت عيونه من جهدها جحاضي

حيثك فتحت الجرح من غير تنظيف=زاد الألم والطب فيه افتراضي

أحد(ن)يقول نضمده بالتلافيف=الأمر هيّن ما يبي له مخاضي

خلك بوسط الملعبه شخص حرّيف=العب لعب شطرنج حاكم وقاضي

واحد(ن)يحوق بطبخته كنه الشيف=ناره تلظّّى بس مابه مقاضي

واحد(ن)على بوابة النت حرّيف=شبعان نوم وزاد والبال فاضي

يملك مفاتيح وحلول وتصاريف=ياويل من يبدي عليه اعتراضي

وانتا حكيم وفاهم ورايك منيف=راعي اختصاص ووارد(ن)للحياضي

تعْرف بأن الأمنيه كنها الطيف=ومحد(ن)عن احلامه ترى اليوم راضي

وتوجيه الاريا بين هاقي وعرّيف=معادله محكومة الإنقراضي

وان قلت شيف اقول به شي ماشيف=مابين زين وشين جاك احتفاضي

وانتا وانا واهلك نراقب بلاحيف=نعمل عسى الرايه كساها البياضي

رسالتك وصلت.ووصلت بلازيف=وماني عن الزله شرود متغاضي

واوصلتها للي تبي دون تطفيف=وشرحت ما بين الخطوط العراضي

سمينا وجه السعد مكرم الضيف=اغلا تحياتي بها الشعر هاضي

سلام من شقرا الى مسجد الخيف=وعد المطر واعدا ما البرق ناضي

أبوأنس