لا سرت في دربك على نهج الاجداد

[الطائر المهاجر]

لا سرت في دربك على نهج الاجداد = تمشي عدالٍ والرجوله تخاويك
واضح صريحٍ والأمانه لك عماد = وحب الوطن في داخلك ما يخليك
يروح عمرك ما تقضبت بشداد = وفي الاخره تصحى على الوقت ينعيك
تضرب بكفٍ كف من كثر الانكاد = وتبدا تفكر بالخلل في خطاويك
وتلقى بأنك رحت للغزو منقاد = لكن بلا سيفٍ ولا درع يحميك
سلاحك مبادي انتهت وقت الاجواد= ولو يدّعيها البعض همّه يسليك
تعبت لكن مستمرٍ على عناد = تحلم تعوّد سالمٍ من مغازيك
وفي الاخره تلقاك في وسط الاضداد= كلٍ يبي ينهشك من وين يوذيك
في وقت صار الخلق للقرش عبّاد= والمصلحه تحكم علاقة مواليك
حتى القريب اللي على الظن معضاد = لاشاف ما بك فود يمكن يخليك
لاتقول ذا ابني وذا الدرع وزناد= ولا تنصدم لا صار من ضمن شانيك
ولا صار حب الدار في القلب يزداد= وباسباب هذا الحب كثرت بلاويك
فاعد النظر من قبل ما يوم تنصاد= ويبان لك علمٍ يخيّب هقاويك
فحب الوطن اصبح قصيدٍ لنشّاد= ولحنٍ يعزفه تاجرٍ كود يغريك
ما يجتمع حب وخيانات وافساد= ومن قال احبك ياوطن فيه تشكيك
حطك جسر من شان ياصل للاسياد= ويعطى الثقه حتى بنهبه يجازيك
ومن حبك بصدقٍ فلاعنه نشّاد= يحس باللي من زمانك يعنّيك
عينه بصيره لكن اليد باصفاد= ومن كثر حراته تجنّب مفاليك
يعيش في الدنيا قنوعٍ وزهاد= قلبه عليك ويرجي الله يحميك