قلبى بحب البيض ماهوب تايب ،،

[داعي الشوق]

عزي لمن قلبه من الحب ذايب = متولع براع العيون الوسيعه

ريمٍ حسين الدل سيد الحبايب = خدٍ و قدٍ و المحاسن بديعه

اللى بهجره زاد بي العطايب = الروح با سبابه تراها صريعه

خلي بقلبي شب فيه اللهايب = نارٍ سناها بالضماير شنيعه

يازين خاف الله ويش السبايب = مالك على الهجران عذر وذريعه

با سبابكم يازين شفت العجايب = عذبت قلبى يا شتاه وربيعه

حبيبي اللى من كبار النسايب = اللى لهم صيتٍ وهامه رفيعه

أهل الهوى يشكون ضده طلايب = على قضاة العشق و اهل الشريعه

من شاف خلى زاد فيه العقايب = لو كان خلى ماشي بالطبيعه

يمشى بحاله والعوالم نشايب = ذولا مصاويبٍ و ذولا جزيعه

وانا من اللى مستصيبٍ وصايب = رمانى المزيون رميه سريعه

ياليت ما شفته بذيك الركايب = و ياليت ريعي ما تلاقى بريعه

أنا عليل اليوم والراس شايب = ضاقت على حالى فجوجٍ وسيعه

قلبى بحب البيض ماهوب تايب = عجزت من عذله و نفسى تطيعه

ياناس قولوا له ترى الحال عايب = عله يواصلني و ينسى القطيعه