العيون السود

[عماد الشريف]

سلهمت لي بالعيون السود وارختلي هدبها=ليتني ما شفتها والناس ما يدرون عني
جيت انشبها فحبي مير أنا طحت فنشبها=كيف طحت وكان هذا الفن قبل اليوم فني
عاتبتني بالحنان وعلمتني في عتبها=بأنها أقرب من هواجيسي وتفكيري وظني
وطلبتني فالوصال وكيف ما ألبي طلبها=دامها اللي علمتني حبها من صغر سني
وقلت أبا أنشدها عن جروح الغرام ومن سببها=قلت أنا المجروح قالت كل جرح فيك مني
يا بعد كل القصايد يا حبيبة من كتبها=خايف إن الحب كله يصبح أحلام وتمني
يوم غبتي كني اللي فاقدٍ حاجة طلبها=ويوم جيتي من سرور القلب مدري ويش كني
المشاعر ساليه لكن تدري وش جذبها=ذكريات من بعد فرقاك دايم تمتحني
يا حبيب القلب نار الحب لا تلحق حطبها=يكفي إنه راح عمري فالعذاب وفالتعني
روح من حبك وش اللي تستفيده من تعبها=وقلبك القاسي متى من قسوة إحساسه يحني