مير البلا لامن حسدك اقرب الناس ..!!؟؟

[ابوعبدالرحمن القريشي]

عادي يصير انك من الناس محسود = مير البلاء لا من حسدك اقرب الناس
ترجع ليالي وقتك المزهره سود = وترجع حساباتك على اخماس واسداس
وخيال جوك كنه بروق ورعود = بلاوي (ن) من كبرها توجع الراس
وياللي خلطت بلقمة العيش بارود = عقب المعزة عيب ترجع وتنداس
طعنة ظهر في داخله سم مسرود = تسري به عروق الحسد لأوسط الراس
ليه العرب ما بين حاسد ومحسود ..؟= وليه القلوب البيض طاويهن الياس..؟
ناسٍ تذابح والسبب ناعم العود = وناس على حب الذهب تركب الراس
وناسٍ بحاله مابهم بالعرب زود = تلقاه محسود على شربة الكاس
يالله تعمي كل حاسد ومقرود = وتنزع جذور الحقد من داخل الناس


اتمنى ان تنال على القليل من ذائقتكم
ابو عبدالرحمن القريشي