قصيدة للشاعر:بدر بن عواد الحويفي الحربي

[ضعيان البدرانى]

الشاعر بدر بن عواد الحويفي لما تقدم به السن قال هذه القصيدة وهي عبارة عن نصيحة ووصيه يوصي بها إبنه أحمد.
ياأحمد أنا يابوك شوفي تدانا***تقريب ثلثينه فقدته من العام

والحيل والله يالحويفي توانا***وحسيت عجزي بالمفاصل والأقدام

الله بوصلك لا يخيب رجانا***آمين يامنزل تبارك والأنــــعام

أوصيك بالتقوى وحفظ الأمانا***والوالدين حقوقهم فرض ولزام

أبيك لا من الزمان إحتدانا***تاقف معي لمصادمة غبر الأيام

حقك وفينابه ونطلب وفانا***عسا السعد يبرح لك الدرب قدام

وترى التمسك بالعبادة رضانا***والرزق عند اللي بالأحوال علام

وترى الشريف وسمعته ما تهانا***وإلا الجهل ضد الرجوله وهدام

يرميك من روس العلا للطمانا***ويرخص مقامك عند ربعك والأخصام

وصحبة ضعيف الدين راس الهوانا***والله خلق بالناس مذموم وحشام

والمرجله صحبة طوال اليمانا***اللي عن الشكه بعيدين وكرام

وصحبة قرين السوء تعدي ضمانا***ومن لاحسب للعاقبه طاح ما قام

وعن ما يعيب النفس ربي نهانا***وحنا عرب وسعارنا دين الإسلام

الله عن الفعل القبيح يحمانا***ويجعل لنا من طاعته درع ووسام

عساه للفعل الصواب يهدانا***وإنه يجنبنا المعاصي والأثام

تقصيرنا واجد وواجد خطانا***والله كريم وللمنيبين رحام

الله مراقبنا ويعلم خفانا***حنا ننام وخالق الكون ما نام

بأمره تكونا وله منتهانا***حكمه يدوم وعمر الإنسان ما دام

ننسى حقوق الله وهو ما نسانا***وأعمالنا تحصى على روس الأقلام

مشاكل الدنيا سبايب وبانا***تضحك لنا وخلافها الموت هدام

تضحك لنا الدنيا ونطرد شقانا***ونعيمها فاني مثل طيف الإحلام

الموت وحساب المحاسب ورانا***مادامت الصحه وتنعيم الأجسام

وصلوا على اللي للشريعه دعانا***أعداد من صلى الفرايض ومن صام