صوت الكاشف وصدى الرعد

[عبدالله الشويمان]

اخواني واخواتي الاعزاء...اخي العزيز منصور المري كتب قصيده ووضعها في الهمس بعنوان يستاهل المدح راعيه..اهداء موجه لي الله يسلمه ويوفقه..فرديت عليه بما املته القريحه.
اتمنى ان تصل الى مستوى قصيدته ..وتعجب القراء.



يقول الشاعر منصور المري (الكاشف)

لاهان من هو يرفع الصوت لاهان=صوته يعجب اللي لصوته شفـاوي
لاجر صوته كنه الذيـب سرحـان=منه تخـاف المبَلـه والشـواوي
ان زان بدع القاف والا بالالحـان=ايجبهـا حيثـه عليهـا رهـاوي
صوته زئير الليث ايهـز الاركـان=ماهو بصوت اللي من اهله سحاوي
مثل الرعد وهو الرعد والاسم بان=هو سترهـن لاطوحـن الغطـاوي
يالله تحفظه من عمل كل شيطـان=واعداه تهلكهم من اشهاب هـاوي
ماهو بحاجة مدحتي لـه كحيـلان=شبل الاسود وفيه منهـا حـراوي
صوبه سلامـي عـد ماهـل ودان=واعداد حصماها ونجـم سمـاوي
-------
وردي عليه ما يلي


حي السلام اللي لفى منك صُفطان=يالمري اللي للمكارم هواوي
تبقا انت فوق النايفه عالي الشان=حرٍ من احرارٍ على الطيب قاوي
يا معرب الجدان من نسل قحطان=منصور يالمِهْدِي قبلنا الهداوي
يا شاعر العذبات قافٍ وميزان=روايح ابياتك كما عود جاوي
يغرن بشيلتهن ويطردن الاحزان=حيث المعاني وافيات وتساوي
من يوم انا غنيتهن خاطري زان=وانا احمد الله ما خذلت الهقاوي
الله يطول عمرك إبزود الايمان=حاميك ربي من عموم البلاوي
ولك السلام اهديه مع عذب الالحان=من قلب مخلص يا شريف العزاوي

وسلامتكم

عبدالله الشويمان الرعد