وش تفيد مشاعري لو بكت ذات الخمار

[نجم الإبداع]

بعد عيني شافت ارض العرب حرب ودمار =مابنا للشعر فاقه ولا للعرف دور
بعد كان القدس هم العرب ضاع المسار = اخرجو العفه من القصر واطراف الخدور
التطاول في البناء والسفر عبر القطار = والتقارب بين الاوطان والعالم فجور
كلها فتنه وعند الملك جنه ونار = جنته لاهل الامانه وفي النار الكفور
ياوجودي وجد من حب له طيرٍ وطار =او وجود اللي مسافر على متن البحور
يوم ناظر والعرب من مطار اليا مطار=يقتلون الطفل والشيخ والثكلى تهور
وش تفيد مشاعري لو بكت ذات الخمار = يبكي اهل الشام قلب العرب جوف الصدور
والعراق المندبغ دبغ حتى الانفجار = تحت حكم ايران محيين بالشرك القبور
دار هارون الرشيد اشتكت والصمت عار=غير من ينخى الغثاء عاد منهم بالثبور
كل فتنه رافعه لاجل غايتها شعار= ليبيا وارض اليمن وارض سيناء ياغيور
يالطيف الحال حار الحليم اليوم حار=يقتل الاطفال وتهد فوق الروس دور
قرننا الخامس عشر حل فيه الانحدار=شبت النيران بين العرب والحرب زور
يالله انك تنصر الدين وتحل الحصار =عن ديار الشام والموت بالبرميل جور
واكفنا شر الفتن من يمين ومن يسار =والصلاة على النبي الهاشمي مافج نور