الهنـــــوف المترفـــــة

[عادل بوبدر]

بسم الله ابدأ


أجمل ليالي العمر في وصـل الهـنوف المتـرفه=يسري غلاها في الحشى مسرى الشراره في الهشيم

في ليـلةٍ غـاب القـمر في ذمّـتي إنها منصفه=واثـنى عليّ بـدر البـدور النور في ليل العـتيم

منه التعـطّف في غـنــَج وأنا عليّ التكـلفه=وأعـطيه نفحـاتٍ تـداوي عـلّة القـلب السقيم

ذكـــرى.. تـباين عودك المـيّاس لين و هـفـهفه=يميل ميل الغـصن مع نـفح الهوا عند الصريم

أنا أشهد إنا مسرفـين وخـلق ربي مسرفه=يا الله تغـفر ما مضى لي يا غـفور ويا رحيم

يا فايق التوصيف يا زين ٍ عجزت أوصّــفه=يا ديمة ٍ يمطر غلاها لوّ ما في الجو غيم

فتحت لك باب المحبه وانت كلك معرفه=تعرف غلاك وعارفٍ سر الجديد من القديم

كل المشاعر تحت راياتك مشت متحالفه=تعلن ولاها من مفاهيم ٍ تغـذت في الصميم

دونك ينابيع الهوى والدلو بيدك وأغرفه=وإليا أرتويت إسق النديم اللي ورد عـدّ النديم

لا تعتذر والعذر يا سيد الغلا وين أصرفه ؟=وأنا على جال الرجى خـلّــتـني أشواقي مقيم

مانيب من ياتي على صدفه و يمكن تصدفه=أما دسَم وإلا سمَح من مَــدّة الكف الكريم

أنا ملازيم الوعد وإليا عطيته ما اخلفه=وآتي على دعوى حميم ٍ يرتجي شوف الحميم

خل الوصل يمسح مذاريف العيون الذارفه=ويعزز اركان القلوب اللي شجنها مستديم

يوم المعزه سيّـرت بعض البشر متوالفه=غصب ٍ على العذال والواشين وإبليس الرجيم

بعض القلوب تعيش في ديره وهي متخالفه=والحب يجمع ساكن الطايف بـ سكان القصيم

قلم عادل بوبدر