شعرٍ بلا معنى وحس وميزان

[الطائر المهاجر]

شعرٍ بلا معنى وحس وميزان = ماهو بشعرٍ يستحق القرايه
ولو كان من شاعر كبيرٍ وفنان= له شهرته بين العرب بالدعايه
يخرب على نفسه بهرجٍ بلا اثمان=لأنّه يبي يكتب على ادنى حكايه
متعود التطبيل للمدح هيمان = ولو جاه نقد قال هذي شنايه
وقصر الفطاحل واضح بكل تبيان= ما يقبل الهزله وهرج الغوايه
نقوة رجالٍ بالمواقف لهم شان = بالدين وسلوم العرب كالمرايه
شبابهم والشيب اخوات واخوان= في اسرةٍ وحده على كل غايه
يمشوا عدالٍ واعتدالٍ بإلايمان = خطٍ وسط مابه ميول وردايه
يمثلون امه ولو كانت اوطان = الدين واحد والتشرذم جنايه
نحاول نلم الشمل من غير بهتان= نقرب مسافاتٍ بطيب الرعايه
انفهّم اللي جاهل برسم عدوان= واهدافهم فينا وخطر النهايه
فحنا بنظرهم واحد بكل الاحيان= خشاش ما نسوى لديهم نفايه
من صالح العدوان الغرب وايران=انا نحارب بعض مامن درايه
شيعي وسني والحضر غير بدوان= وهذا وهذا والصفر له كنايه
فرق تسد قانون من كان طمعان= بارضٍ وشعب بالسياسات تايه
لابد ما نصحى قبل فوت الاوان= ونجمع شملنا قبل وقت الرزايه
ونعرف عدوٍ لو يغير بالألوان = الحقد طبعه واضح من البدايه