لا باس يالغالي طهور و سلامات

[داعي الشوق]

لاباس يالغالي طهور و سلامات = يالله عسي ماجاك اجر و عوافي

و يعدّي المكروه عنك و مضرات = و يحميك من شر الصدور الخوافي

عودتك يالغالي علينا مسرات = والكون نوّر عقب ما كان طافي

واستبشرت كل المعاني للابيات = وقامت هواجيسي تسوق القوافي

في غيبتك عشنا التعب كل لحظات = و ضاقت مراكب وقتنا بالمرافي

وعلى شروق الشمس حزن وعلامات = والجو متعكر ولا هوب صافي

بقلوبنا ندعي لك بكل الاوقات = تبقى لنا وتعيش دوم متعافي

لو في يدينا للمقادير حيلات = تفداك روحي يا بعد كل حافي