الحظ الأقشر

[محمد بن عمار]

السلام عليكم /
ولكم موعد مع بن عمار
وحظه الأقشر اللي مخاويه
مدى الحياة اللهم ياكافي
كل شطر قافية ..!

الحظ الأقشر


ياشقا ، قلب ٍ تحيّر = في هوى غرو ٍ يتله ّ
راعي العين الحنونه = اللي أشغلني بغرامه

قسمتي والحظ الأقشر= ساقت الرجل لمحله ّ
من بعد ، لدّة عيونه = وين قلبي والسلامة

في طريقه لا تهصّر = رأس ، ردفـه ما يقـله ّ
مشغل الناس بفنونه = مشيته صارت علامة

بالمبيسم موت ٍأحمر= يشفي العطشان غـله ّ
ونظمة اللولو سنونه = لاغنج لي بأبتسامة

ومن نظر للصدركبّر = روض للوسمي يعله ّ
مثل طلع التين لونه = والحجم بيضة حمامة

مطلق ٍمجدول ٍأشقر = فوق متنه ، يوم فله ّ
وغرة ٍ حفة جفونه = تنتثر، لأرخى ، لثامه

نور عيني لو تغير ّ = وسط قلبي مرتع ٍله ّ
بالحشا أرسى ركونه = وبالصدرعلا ّ مقامه

الغلا بالجوف يصهّر = قرص كبدي مستحله ّ
ساطيات ٍ بي طعونه = بالحشاء راكزسهامه

من عناه العين تسهر = دمعها ، دايم ، تهله ّ
مثل وبل ٍ في مزونه = لا تحدر من غـمامة
ّ
عقب ما وصله تعثر = صارت أعذاره ممله ّ
جدد بقلبي ، حزونه = بالتشرّه ، والملامة

كيف عقب الود قرر ّ = للهجر من غير زله ّ
عاذل ٍ قد حال دونه = ليتني أعـرف مرامه

لوشكيت الحال يظهر = ماخفاء للناس كله ّ
وكل علم ٍ يجهلونه = صار سلعة للنمامة

الهوى راعيه يخسر = لا تفارق هو، وخله ّ
مكسبه ذل ومهونة = وآخرالعشرة ، ندامة

مودتي لتواصلكم
محمد بن عمار