الشايب اللي تعدى بالعمر سبعين

[حي الضمير]

كنت انا وزميلي في مدينة الخبر لانجاز مهمة عمل
وقبيل العوده للرياض
حصل لنا موقف
مع أحد كبار السن
والحقيقة ضاق صدري واثر فيني
وكتبت هذه الابيات اتمنى ان تجد القبول من قلوبكم الطاهره


الشايب اللي تعدى بالعمرسبعين =على طريق الخبر يشر وبه كسره
يقول تكفون ودوني على البحرين=بالضبط مرقص عذاري بلحق السهره
ركب ورى واستدار ومدد الرجلين=وهرجه ليامن هرج تفوح به خمره
يقول ابلحق سميره واختها نادين=قبل المسا ساعته اتطوف للعشره
ومن هول موقفه قمت اضرب على الكفين=والصدر ضايق وفي وسط الحشا عبره
ونزلت انا وصاحبي من موتري حافين=احدن رمى عقال واحدن طوح الغتره
ومن حر مابي صرخت ودمعتي بالعين=ابكي على الشايب اللي ضايعن عمره
مابين مرقص وبار وبينها ومابين=راحت حياته وهو مافكر بقبره
وياعود منهو بعمرك عايشن ذلحين=بارض الحرم معتكف او ياخذ العمره
وياعود منتب صغير السن بالعشرين=مابينك وبين قبرك كود به شعره
ولاتنسى حزة وقوفك حافي القدمين=يوم الحشر يوم كلن شاخص النظره
ماينفعك وقتها طردك ورى الغاوين=ماينفعك غير ماقدمت بالنشره
ولاني بشامت ولاني مفتين بالدين=لكن نعرف الخطا والصح بالفطره
صحيح في هالزمان اللي قبولة شين=قابض على الدين كالقابض على الجمره
والوقت يمضي وحنا بالزمن لاهين=واشوف انا الناس ياهي حيل مغتره
وهالعود وامثاله اللي ضيع الثنتين=شرن هواهم ودنياهم بها الحسره