اغتيال ريشة

[مازن حجازي]

لإنك كنت مش مجهول
لإنك كنت بتقولها وصعب القول
لإنك كنت بتسن القلم وتطيح
لسان علقم وقلب فصيح
لأنك كنت بتعبر بإحساسي
لإنك كنت متصنف ولد عاصي
لإنك كنت فى زمن الطواشي غول
فكان لازم تموت بدري
وكان لازم تموت مقتول



لإنك كنت مش هتيف
فقير ونضيف
ولابس جزمة من باتا
ولو وياك جنيه وجعان
تمده لواحدة شحاتة
لإنك كنت من توبنا
ورقعة توبنا من توبك
لإنك كنت صرختنا
ونارنا هي مكتوبك
لإنك كنت عنترنا
واول خطوة فى السكة لمشوارنا
فكان لازم تموت بدري
وكان لازم تموت مقتول


تعبت كتير وكان حلمك
ملازم كل أحلامنا
رغيفنا ينقسم بالحق
ربيعنا يبتسم تاني
وتصفى والسماء تزرق
على كيفنا نقول ماشي
على كيفنا نقولها لاء
فكان لازم تموت بدري
وكان لازم تموت مقتول


منقووووووووووووووووووووووول