الخيال !!!!!!!!

[محمد بن لقفص]

لو الخيال اللي نعيشه تحــــــــقق=كان اسمنا غطا ربوع الجـــــــزيرة
والصيت كان أضفا وغرب وشـــــرق=وأصبح علمنا رمز في كل ديـــــــرة
واشعارنا فوق المباني يعلـــــــــــق=كل يحاول يسرقه من قصيــــــرة
واللي يبي تقليدنا ما توفـــــــــــق=يبلش ويتخبط بغبة مصيـــــــــره
وأوراقه اللي قد كتبها تشقـــــــق=ويضيق من هول الطريق المريــــرة
ويحس حاله في ظلامه توهــــــــق=ويعيش في وسط اللهيب السعيـــرة
لنّا تفردنا بشي تعـــــــــــــــــمق=في لوحة تحمل رموز شهيــــــــرة
لو قيل تحلف قلت بحلف وأطـلــق=إن الخيال أتعب نفوس كثيـــــــرة
لكن خيال الآدمي بس حـــــــــرق=قلبه عسى في الأمر يا رب خـيـــره
ليتك توقف يالخيال المشـــــــــوق=واترك فؤادي يهتني مثل غـــيـــره
من بعد خمسين مضت لا تدقـــــق=صبرك ولو دست الطريق الخطيــرة
واعكس خيالك بالصحيح الموثــــق=واقصر مدا عينك ولو هي بصــيرة
وابسط وخلك في حياتك مــــــروق=وانس الهموم الطائلة والقصيـــــرة
بين الوهم والحق لازم تفــــــــرق=واحسب حساب العمر شره وخيره
خيالك اللي في سما الفكرحلـــــــق=لا تتبعه لو هي طموحك كبيـــــره
واحذر بشي ما تطوله تعلـــــــــق=ترا مواصيل التمني عسيــــــــــرة
خيال مثل البحر من جاه يغـــرق=يخسر صفاء جوه ويفقد عبيـــــره