حنا هل العوجـاء

[كظيم]

ياحيف ياللي تبخسون الرياجيل=وتشبهون افعال ناس ٍ بناسي
افعالنا فاقت سحاب المخاييل=وافعالهم بالارض تحت المداسي
واقوالهم هرج ٍ وكله تهاويل=واقوالنا فعلْ وحنى كل راسي
اول وانا لي درب كله عراقيل=درب ٍ صعيب ولا مشاه الخساسي
ما مرّ منه الا كريم الافاعيل=طيب ٍ معه جوده وابو قلب قاسي
زاحمت بالمنكب رجال المشاكيل=ونصّبت نفسي بعاليات الكراسي
واليوم ياستار حتى الخناطيل=قامت تزاحمني وتجرح احساسي
حنا هل العوجاء وحرب المقاتيل=لامن لفاك الجِد شفت الحماسي
ومثل النعامه يختبون المذاليل=هم ما دروا بالوقت قمرا اوشماسي
اما انت يابن العم فعلك مشاعيل=ياراعي النخوه وطيب الاساسي
صديق عمري لو عنته البهاذيل=ماغيرت طبعه ولا هو بناسي
بيني وبينه عشرة النجم والليل=يا ما شربنا الحلو وامرار كاسي
هذي علوم اللي علومه قناديل=قيد الوقيدي طود ثابت وراسي