معانات ( يـــــــــــــتــــيم )

[عبدالمحسن الرحمه]

أنا اليتيم اللي من الهم تعبان=أرجي ولي الكون رب البرية
أرجيه يرحم حالتي دوم حيران=حيران من جور الليالي الشقية
أبوي ميت صرت من دون عنوان=عنواني آه ٍ بالضماير خفية
دمعي على خدي مثل وبل الأمزان=حيران بالدنيا وحالي رديه
تبحربي أحلامي على شط الأحزان=أرسي على مرساه مالي هوية
توي صغير وشفت ضيم ٍ وحقران=من دنيتي ذقت القسى والأذية
ياليت قبرك فيه باب ٍ علا شان=أزوركم يا بوي صبح وعشية
ولدك بهالدنيا بلا مال طفران=عايش على جود النفوس الزكية
العيد قرب ولحشا فيه نيران=ما غير أعايد دمع عيني طرية
هذا شرا ثوبه مع أمه وفرحان=وأغراض عيده من عطور وهدية
يرقب طلوع الشمس بالحيل شفقان=يلبس جديد الثوب نفسه هنية
يعايد أمه والجماعة ولخوان=بسمة شفاته صدق ياهي بهية
يسعد مع أمه يحتضنها بلا حضان=ينسى هموم الوقت لو هي قوية
وهذا أبوه اللي يراعيه بحسان=يعطيه في كفه هدايا وعدية
وأنا لحالي ثوبي اليوم وسخان=فقدت أبوي اللي يخفف عليّة
فقدت أنا عطفه به الحب مزدان=وفي مرقدي يحكي حكايا ثرية
عيني تزف الدمع والفكر مشتان=حيران مالي غير رفع الشكيه
أرسم خيالك يا يبه بحلى ألألوان=في وسط جوفي ما يفارق عنيه
صوتي مثل ذيب ٍعلى رأس ثهلان=يقنب تقل مقروص من رأس حيه
ركبت مع حلمي على صهوة حصان=ودي أداعب قبر بويه بيديه
يما قضيت الليل خايف وجوعان=فقدت أنا حلو المأكل شهيه
في غرفتي جالس وأنا حيل بردان=أبحر مع أفكاري ولا فيه نيّه
عايش وحيد ٍ لاجماعة وخلان=مالي سوا ربي ولي البرية
الواحد اللي عالم بكل ما كان=راجيه ييسر لي حياة ٍ مدية
وأعيش بالدنيا بلا هم وحزان=وافرح مثل غيري ونفسي رضية
يا الله يا رحمن ياخالق الجان=يا عالم ٍسر النفوس الخفية
ترحم حياة أللي غريب بالأوطان=تلعب به همومه بروحه وجيه