كثير الهم مع زود البلاوي

[الطائر المهاجر]

كثير الهم مع زود البلاوي = على المؤمن ترى فيها امتحانه
من اللي عالم حال الشقاوي= يبي ينظر لصبره واتزانه
بعضنا ليّنٍ كالغصن ذاوي= على ادنى عاصفه تكثر حزانه
سجين النفس للاحزان غاوي = ويمرض كل من فكر بشانه
عنيد الراي مايبغى مداوي = يشوفه بالحزن يكسب مكانه
يطيع ابليس في كل الخطاوي = يجره دون يدري للمهانه
مثل هذا فلا له يوم تاوي = وخله دام راضي بانسجانه
حياته مثلما الموت متساوي= مادام انه رضى حيٍ دفانه
وبعضٍ كالجمل للحمل قاوي = على الويلات معتادٍ حصانه
ولو هبت عواصيفٍ قساوي = فلا هي من يؤثر في كيانه
رضا باللي انكتب مابه جداوي = يبي ياقع ولا يدري اوانه
واذا منه وقع حرٍ نداوي = يضمد جرحه النازف سنانه
واذا من جارت ارضه بالبلاوي= يفل الجنح مايدرى مكانه
ولا يكثر لغير الله شكاوي = فشكوى للخلايق فيه اهانه