دوامة التفكير

[سعيد الغامدي]

كل عام وأنتم بخير

وكل عيدي وأنتم من العايدين

تقبل الله طاعتكم وبارك لكم عيدكم


هليت عبرة فراقك من الم في سكات=واللحظه اللي تجيب فراقك املها
تمر دوامة التفكير باربع جهات=وتصتدم بالجهات الاربعه كلها
احاول انسى واردد كل مافات مات=واقول ليه الدموع من اجلك اهلها
ما اظن تحتاج يا المجمول مني وصاة=قضية الحب بيدك واعطني حلها
متى تجيني ضعونك يالغضى مقبلات=وكبودنا من مزون وصالك نبلها
نعيد بالوصل ما يرضي من الذكريات=والذكريات الاليمه نقدر نزلها
تغدي رياض الحشى من شوفتك مزهرات=ما فيه غيرك محاني روحي يدلها
اصبح وقيِّل وخذ لك بالمشاعر مبات=وادخل قلاع المشاعر قسر واحتلها
واترك كلام الرخوم وخذ كلام الثقات=الديره اللي تخون بربعها خلها
واعمر ديارك بقلبي ثم لم الشتات=وسيوف هجرك دخيلك بطل تسلها
قلوب من دون احب اشوفها خاويات=وقصور من دون رود اش فايدة زلها
وحب من دون وصل بيفتقد للثبات=والروح ما تستقر اذا هجر خلها
اربط عرى الود في دنيا الغلا بالصلات=وازرع نخيل الوصال يبردك ظلها
تعال ننسى كلام اهل الردى والوشاة=ونعيش زهر الحياة ونقتطف فلها
ما أقول هذي حياتي كيف ما جات جات = لاجل إنها لو غدت ما بقدر أعلها

تقبلوا تحيات

سعيد الغامدي