كبــــــــــــــــــوة حـصــــــــــــــان

[سعود القت]

يامدعين المعرفه كفو اللوم = التايعه من ماني مدور قضاها
لو افردة رمانة لسان مسموم = الشك زايل واللهاه بجماها
ما نشتحن من شره ما يتقن العوم = يرفد ونفسه عايله ماقداها
نحشم لحانا عن ردا الغير ونشوم = واهل العوُج تشتالها في لحاها
سلمٍ لنا نحييه قومٍ بعد قوم = ما نتبع العالم بسكة رداها
لن جا العيا من مرتوي طيب شغموم = صميدع دروب الشكاله مشاها
قلنا فداه وكبوة حصان ويقوم = ولافاق منها يشتقي في دواها
محدٍ من الزلات محمي ومعصوم = والطيّب ليا جات زله رفاها
وان جا العيا من قاصر شبور وعزوم = طوّح بكلمه مادرا وشمداها
نعرض عنه لو كان ما يطلع الدوم = نكبح جماح النفس عن مشتهاها
حيث ان ما بمزاود الهرج مغنوم = ولا تنقص من الجم دلوٍ ملاها
نصبر ويبدا سومنا لعتلى السوم = والذارفه بارت بيد من شراها
ندمح خطا الجاهل على شان محشوم = ومن يذخر الجزلات يلقى جزاها
ولا يستشك الا رديٍ ومذموم = ادناة ملحق نفسه لمنتهاها
للطيب فالطيّب علامات ووسوم = يعرف بها حتى ولو ما تباها
واهل الردا لو تبدي الطيب وتزوم = منضوح هرجتها يبيّن خفاها
وعسايفي شفرات برموز ورقوم = يشرح سبب تدوينها محتواها
اسم غفال ولا اتعرض لماسوم = نوايدٍ من سمعها ما نساها
تاتي قوّد والصعب يعسف وملجوم = شرد المعاني في يديه عصاها